តេក្វាន់ដូ៖ លោក បួន ហ៊ីងសុធីយ៉ា អគ្គលេខាធិការសហព័ន្ធកីឡាតេក្វាន់ដូ ITF កម្ពុជាបានឲ្យដឹងថា សហព័ន្ធបានត្រៀមវិញ្ញាសាចំនួន ៣៣វិញ្ញាសាដើម្បីដាក់ក្នុងការប្រកួតប្រជែងនៃព្រឹត្តិការណ៍ស៊ីហ្គេមលើកទី៣២ ដែលកម្ពុជានឹងធ្វើជាម្ចាស់ផ្ទះ។
លោកថា នេះគឺជាយុទ្ធសាស្ដ្ររបស់សហព័ន្ធ ដើម្បីឈានទៅប្រកួតប្រជែងដណ្ដើមមេដាយជូនជាតិ ពិសេសដើម្បីសម្រេចផែនការដណ្ដើមមេដាយមាសចំនួន ១៥គ្រឿងឲ្យខានតែបាន។ ក្នុងចំណោមវិញ្ញាសាទាំង ៣៣ គឺចែកចេញជា ៥ធំៗរួមមានវិញ្ញាសាមេគុន ប្រយុទ្ធ សម្ដែងការពារខ្លួន បច្ចេកទេសពិសេស និងការបំបែកក្ដា ហើយសហព័ន្ធក៏បានឆ្លងទៅសហព័ន្ធកីឡាតេក្វាន់ដូ ITF អន្ដរជាតិ និងអាស៊ីរួចរាល់ផងដែរ។ អគ្គលេខាធិការសហព័ន្ធដដែលបន្ដថា បច្ចុប្បន្នសហព័ន្ធកំពុងផ្ដោតការហ្វឹកហាត់ដល់ក្រុមជម្រើសជាតិ ពិសេសកីឡាករ-កីឡាការិនីទាំង ៣៣វិញ្ញាសា។ លើសពីនេះក៏គ្រោងស្នើសុំគណៈកម្មាធិការជាតិ CAMSOC ដើម្បីស្នើសុំគ្រូបង្វឹកអន្ដរជាតិកម្រិតខ្ពស់មកពង្រឹងការហ្វឹកហាត់បន្ថែម ដើម្បីត្រៀមស៊ីហ្គេមឆ្នាំ២០២៣ ខាងមុខផងដែរ បន្ទាប់ពីគ្រូបង្វឹកជនជាតិកូរ៉េខាងជើងលោក Ri Cholnam បានបញ្ចប់បេសកកម្មជាមួយក្រុមជម្រើសជាតិតេក្វាន់ដូ ITF កម្ពុជាកាលពីចុងខែមីនាកន្លងទៅ៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
