ភ្នំពេញ៖ ឯកឧត្តមសាស្រ្តាចារ្យ ម៉ម ប៊ុនហេង រដ្ឋមន្រី្តក្រសួងសុខាភិបាល សហការជាមួយផ្នែកពាក់ព័ន្ធ នាព្រឹកថ្ងៃទី១៧ ខែមិថុនា ឆ្នាំ២០២២នេះ បានអញ្ជើញចុះពិនិត្យមនី្ទរពេទ្យហ្លួងម៉ែ ដែលមានទីតាំងឋិតក្នុងសង្កាត់ព្រៃស ខណ្ឌដង្កោ រាជធានីភ្នំពេញ ដើម្បីរៀបចំឲ្យក្លាយជាមនី្ទរពេទ្យព្យាបាលជំងឺមហារីក។

ឯកឧត្តមសាស្រ្តាចារ្យ ម៉ម ប៊ុនហេង បានថ្លែងថា ដោយទទួលបានបទបញ្ជាដ៏ខ្ពង់ខ្ពស់របស់​សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រី្ត នៃព្រះរាជាណាចក្រកម្ពុជា ឲ្យក្រសួងសុខាភិបាល សហការជាមួយផ្នែកពាក់ព័ន្ធ ដើម្បីរៀបចំមនី្ទរពេទ្យហ្លួងម៉ែ ឲ្យក្លាយជាមនី្ទរពេទ្យ ព្យាបាលជំងឺមហារីក។

ដូច្នេះហើយទើបព្រឹកនេះថ្នាក់ដឹកនាំ ចុះពិនិត្យ និងវាយតម្លៃ នូវសម្ភារបរិក្ខារពេទ្យ និងសម្ភារ​ប្រើប្រាស់​ផ្សេងៗទៀត ដែលអាចប្រើបា្រស់បាន និងអ្វីដែលក្រសួងត្រូវបំពេញបន្ថែម និងធ្វើផែន​ការមេ ដើម្បីធ្វើឲ្យសម្រេចបាននូវមនី្ទរពេទ្យហ្លួងម៉ែនេះ ឲ្យក្លាយជាមនី្ទរពេទ្យព្យាបាលជំងឺមហារីក ក្នុងព្រះរាជាណាចក្រកម្ពុជា។

ឯកឧត្តមសាស្រ្តាចារ្យ ម៉ម ប៊ុនហេង បានបញ្ជាក់ទៀតថា ក្រុមការងារបច្ចេកទេសនឹងពន្លឿន​ដំណើរការ​នៃការរៀបចំមនី្ទរពេទ្យនេះឱ្យបានលឿនតាមបទបញ្ជាដ៏ខ្ពង់ខ្ពស់របស់សម្តេចតេជោ នាយករដ្ឋមន្រី្ត ដើម្បីផ្តល់សេវាព្យាបាលជំងឺមហារីកជូនប្រជាពលរដ្ឋ ដំណាក់កាលដំបូង ដូចជា​ការថែទាំប្រើជាតិគីមី និងការវះកាត់តូច និងពង្រីកជាបន្តបន្ទាប់ទៀត ដោយបន្ថែមម៉ាស៊ីនកាន់​តែទំនើបៗ ដើម្បីធ្វើឲ្យការព្យាបាលជំងឺមហារីក កាន់តែខ្ពស់ និងមានប្រសិទ្ធភាព។

ជាមួយគ្នានេះ ក្រសួងសុខាភិបាល ក៏មានផែនការច្បាស់លាស់ ក្នុងការសាងសង់មនី្ទរពេទ្យ និង​មណ្ឌលសុខភាព តាមបណ្តាខេត្តនានា (ដូចជាខេត្តត្បូងឃ្មុំ សៀមរាប ឧត្តរមានជ័យ ប៉ៃលិន រតនគិរី មណ្ឌលគិរី) ​ជាពិសេសការបណ្តុះបណ្តាលធនធានមនុស្ស ​ព្រោះថា​ឧបករណ៍បរិក្ខារវេជ្ជសាស្រ្ត ជារឿងមួយដោយឡែក។

ដូច្នេះសំខាន់បំផុត ​គឺមានធនធានមនុស្សដែលមានចំណេះចេះប្រើ ហើយទើបយើងយក​ឧបករណ៍​បរិក្ខារវេជ្ជសាស្រ្តមកដាក់ឲ្យដំណើរការ ​ជួនកាល​យើងមានឧបករណ៍បរិក្ខារវេជ្ជសាស្រ្ត ប៉ុន្តែ​ខ្វះ​ធនធាន​មនុស្សដែលចេះប្រើប្រាស់ ​គឺយកមកទុកអត់ប្រយោជន៍។ ដូច្នេះសំខាន់ណាស់ ត្រូវធ្វើការ​បណ្តុះបណ្តាលធនធានមនុស្សជាមុនដែលចេះប្រាកដប្រជា៕ អត្ថបទ រដ្ឋា