សម្ដេចកិត្ដិព្រឹទ្ធបណ្ឌិត ប៊ុន រ៉ានី ហ៊ុនសែន ឧបត្ថម្ភថវិកា ១០លានរៀល និងគ្រឿងឧបភោគ​បរិភោគ និង​សម្ភារប្រើប្រាស់មួយចំនួនទៀត ដល់គ្រួសារស្ត្រីក្រខ្សត់ ដែលខិតខំ​តស៊ូ​រែក​ពុន​បន្ទុក​គ្រួសារ​ទាំងស្រុង បន្ទាប់ពីប្ដីធ្លាក់ខ្លួនពិការ ដោយសារគ្រោះថ្នាក់ចរាចរណ៍ រស់នៅស្រុកក្រូចឆ្មារ ខេត្តត្បូងឃ្មុំ។  

សម្ដេចកិត្ដិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា កាលថ្ងៃទី១៨ ខែមិថុនា ឆ្នាំ២០២២នេះ បានចាត់ឱ្យឯកឧត្តម យូ ឡាណា អគ្គលេខាធិការរងទី២ កាកបាទ​ក្រហម​កម្ពុជា ចុះសួរសុខទុក្ខ និងនាំយកអំណោយមនុស្សធម៌ផ្តល់ជូនគ្រួសារស្ត្រីឈ្មោះ ញេន ស្រីល័ក្ខ អាយុ២៨ឆ្នាំ ដែលជាស្ត្រីមួយរូបបានខិតខំតស៊ូ ជំនះការលំបាក ប្រឹងប្រែងរែកពុន​បន្ទុក​គ្រួសារ​ទាំងស្រុង ដើម្បីចិញ្ចឹមថែទាំប្តីដែលធ្លាក់ខ្លួនពិការមួយកំណាត់ខ្លួន ដោយសារ​គ្រោះថ្នាក់​ចរាចរណ៍កាលពីឆ្នាំ២០១៩ កន្លងទៅ និងមានកូនតូចអាយុ ៣ឆ្នាំ រួម​ជាមួយ​ឪពុក​ចាស់​រស់​នៅ​ភូមិ​ច្រវ៉ាក់ដែក ឃុំឈូក ស្រុកក្រូចឆ្មារ ខេត្តត្បូងឃ្មុំ។  

ក្នុងឱកាសនោះ ឯកឧត្តមអគ្គលេខាធិការរងទី២ បានពាំនាំនូវប្រសាសន៍របស់ សម្តេចកិត្តិ​ព្រឹទ្ធ​បណ្ឌិត ប៊ុន រ៉ានី ហ៊ុនសែន ដែលផ្តាំផ្ញើសួរសុខទុក្ខ ក្តីអាណិតអាសូរ និងការ​កោត​សរសើរ​ចំពោះ​ក្មួយស្រី ញេន ស្រីល័ក្ខ ដែលមានការតស៊ូ ជំនះរាល់ការលំបាកដើម្បីជីវភាពគ្រួសារ និងមិន​បោះបង់​ប្តីពិការ ទោះបីជាស្ថិតក្នុងស្ថានភាពបែបណាក៏ដោយ។ ជាមួយគ្នានេះ ឯកឧត្តម ក៏បា​ន​ពាំនាំ​នូវ​ការលើកទឹកចិត្តពីសំណាក់សម្តេចកិត្តិព្រឹទ្ធបណ្ឌិត ចំពោះក្មួយស្រី និងក្រុមគ្រួសារ សូមកុំ​អស់​សង្ឃឹម ត្រូវបន្តខិតខំតស៊ូជំនះឧបសគ្គនានា ដើម្បីអនាគតក្រុមគ្រួសារ និងកូនស្រីរបស់ខ្លួន ហើយ​សង្ឃឹមថាថវិកាដែលបានផ្តល់ជូននាពេលនេះ ក្មួយស្រីនឹងអាចយកទៅប្រកបមុខរបរ ដើម្បីលើក​ស្ទួយជីវភាពគ្រួសារ និងមិនលំបាកទៅធ្វើការងារឆ្ងាយដូចមុនទៀតឡើយ។ 

ជាការឆ្លើយតបអ្នកស្រី ញេន ស្រីល័ក្ខ និងក្រុមគ្រួសារ បានថ្លែងអំណរគុណទាំងចិត្តក្តុកក្តួលថា «កូនចៅពិតជារំភើបរីករាយដោយមិននឹកស្មានដល់ និងសូមថ្លែងអំណរគុណដ៏ជ្រាលជ្រៅ ដល់​សម្ដេច​កិត្ដិព្រឹទ្ធបណ្ឌិត ប៊ុន រ៉ានី ហ៊ុនសែន ដែលជាមាតាមនុស្សធម៌ បានជួយ​សង្គ្រោះ​ដល់​គ្រួសារ​របស់​គាត់ ដែលកំពុងជួបទុក្ខលំបាកយ៉ាងខ្លាំងនេះ អ្នកស្រីនិងស្វាមីពិការ ពិតជា​ត្រេក​អរ​ខ្លាំង​ណាស់​រកអ្វីប្រៀបផ្ទឹមពុំស្មើ»។  

សូមជម្រាបថា អំណោយមនុស្សធម៌ ដែលបានផ្តល់ជូនគ្រួសាររួមមាន ៖ អង្ករ ១០០គីឡូក្រាម, រទេះរុញមួយ, មី២កេស, ទឹកស៊ីអ៊ីវ ២យួរ, ត្រីខ ២យួរ, ទឹកសុទ្ធ ២កេស, ឃីត២កញ្ចប់ (សារុង ក្រមា មុង ភួយ) និងថវិកាចំនួន១០លានរៀល។ ក្នុងឱកាសនោះដែរ បន្ទាប់ពីផ្តល់​អំណោយ​មនុស្ស​ធម៌ ដល់គ្រួសារខាងលើនេះ ឯកឧត្តមអគ្គលេខាធិការរងទី២ កាកបាទក្រហមកម្ពុជា ក៏​បាន​បន្ត​ចុះ​ទៅសួរសុខទុក្ខ និងនាំយកថវិកាមួយចំនួនឧបត្ថម្ភដល់អ្នកចិញ្ចឹមបីបាច់ថែរក្សាទារក ដែ​លត្រូវម្តាយស្លាប់ចោលក្រោយសម្រាលរួច ហើយឪពុកបានបោះបង់ចោលថែមទៀតផងដែរ៕