ហ្វីលីពីន៖ កាលពីថ្ងៃព្រហស្បតិ៍ម្សិលមិញ យោធាហ្វីលីពីនបានបញ្ជាឲ្យមានការដាក់ពង្រាយ នាវាកងទ័ពជើងទឹកបន្ថែមទៀតទៅកាន់សមុទ្រចិនខាងត្បូង ស្របពេលមានចម្រូងចម្រាសផ្នែកការទូតកើនឡើង លើក្បួននាវារបស់ចិននៅជិតតំបន់ថ្មប៉ប្រះទឹកជម្លោះ។
ចិនប្រកាសគ្រប់គ្រងស្ទើទាំងស្រុង នូវដែនសមុទ្រសម្បូរធនធានមួយនេះ ហើយពួកគេរងការចោទប្រកាន់ពីសហរដ្ឋអាមេរិក ប៉ុន្មានថ្ងៃមុនថាបានបង្កការបំភិតបំភ័យ ជាមួយនឹងការចូលចតទូករបស់ពួកគេ នៅជិតតំបន់ថ្មប៉ប្រះទឹកវីតស៊ុន។ ទីក្រុងម៉ានីលបានបញ្ជាឲ្យទីក្រុងប៉េកាំងឲ្យដកទូក ១៨៣គ្រឿងចេញពីតំបន់ថ្មប៉ប្រះទឹករាងកោងមួយនេះ ដែលស្ថិតនៅចម្ងាយប្រហែល ៣២០គីឡូម៉ែត្រភាគខាងលិចនៃកោះប៉ាឡាវ៉ាន់ ដោយពួកគេចាត់ទុកវត្តមាននាវាទាំងនោះថា បានឈ្លានទៅលើអធិបតេយ្យភាពទឹកដីហ្វីលីពីន។ ទូកប្រហែល ២២០គ្រឿងត្រូវបានរកឃើញ ដោយកងកម្លាំងឆ្មាំសមុទ្រហ្វីលីពីន កាលពីថ្ងៃទី៧ ខែមីនាកន្លងទៅ ប៉ុន្តែពួកគេទើបប្រកាសឲ្យដឹងជាសាធារណៈ កាលពីចុងសប្ដាហ៍មុនប៉ុណ្ណោះ។
ការល្បាតតាមអាកាសរបស់ហ្វីលីពីន ពីលើតំបន់ថ្មប៉ប្រះទឹកនេះកាលពីថ្ងៃចន្ទ បានរកឃើញនាវា ១៨៣គ្រឿងបន្តវត្តមាននៅទីនោះ។ ចិនអះអាងថា ទូកនេសាទទាំងអស់នេះបានចូលចត ដោយសារតែអាកាសធាតុមិនអំណោយផល នៅជិតតំបន់ប៉ប្រះទឹក ដែលពួកគេអះអាងថា ជាផ្នែកមួយនៃប្រជុំកោះ Spratly។ អ្នកនាំពាក្យកងកម្លាំងប្រដាប់អាវុធហ្វីលីពីន បាននិយាយថា នាវាកងទ័ពជើងទឹកបន្ថែមទៀត នឹងចេញល្បាតការពារអធិបតេយ្យភាពទឹកដីរបស់ខ្លួន នៅតាមផ្លូវទឹក។ ទោះបីជាយ៉ាងណាក៏ដោយ អ្នកនាំពាក្យម្នាក់នេះមិនបានបញ្ជាក់ថា តើនាវាទាំងនេះនឹងធ្វើដំណើរទៅជិតតំបន់ថ្មប៉ប្រះទឹកជម្លោះនោះទេ៕
អត្ថបទ៖ សារ៉ាត់
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
