ឯកឧត្តម យឿន យឿត ទីប្រឹក្សារាជរដ្ឋាភិបាល បានចាត់ទុកថ្ងៃទី២០ មិថុនា ១៩៧៧ ជា​ការចងចាំដ៏ពិសេសក្នុងក្រអៅបេះដូង ខណៈព្រឹត្តិការណ៍ដ៍ប្រវត្តិសាស្រ្តនេះ បាន​ធ្វើឲ្យ​ឯកឧត្តមមានការស្ញប់ស្ញែង និងមិនអាចបំភ្លេចបាននោះឡើយចំពោះវីរៈភាព និងគុណបំណាច់​ដ៏ធំធេង​របស់​សម្តេចតេជោ នាយករដ្ឋមន្រ្តី នៃព្រះរាជាណាចក្រកម្ពុជា ដែលបានយកជីវិត​ទៅ​ប្រថុយប្រថាន ​ដើម្បីស្នើ​សុំកម្លាំង​ពី​ប្រទេស​ជិត​ខាង​មក​ជួយរំដោះប្រជាពលរដ្ឋខ្មែររាប់លាននាក់​ឲ្យរួចផុត​ពីរបបប្រល័យពូជសាសន៍ប៉ុល ពត នោះ។

ឯកឧត្តមបានបន្តថា ថ្ងៃទី២០ មិថុនា ១៩៧៧ ជាការចងចាំដ៏ពិសេសមួយសម្រាប់ពួកយើង ដែលមិនត្រឹមតែជាការចងចាំអំពីការធ្វើការសម្រេចចិត្តដ៏លំបាកបំផុតមួយរបស់បុរសម្នាក់ (សម្តេចតេជោហ៊ុន សែន) ក្នុងការលះបង់កម្លាំងកាយចិត្ត និងអាយុជីវិត ដើម្បី​ប្រទេសជាតិ​របស់​ខ្លួន​តែ​ប៉ុណ្ណោះទេ តែជាការរំឭកឡើងវិញនូវស្មារតីនៃក្តីសង្ឃឹម ការជឿជាក់​លើ​ប្រទេស​ជាតិ​ខ្លួន​ឯង ការមិនបោះបង់ចោលជាតិសាសន៍ និងប្រជាជនខ្លួនទោះក្នុងកាលៈទេសៈណាក៏ដោយ។ គម្រូវីរភាពដ៏អង់អាចនេះហើយ ដែលបានចាក់ឫសក្នុងក្រអៅបេះដូងរបស់យើងគ្រប់គ្នា។

ជាមួយគ្នានោះដែរឯកឧត្តមយឿន យឿត ក៏សូមធ្វើការគោរព និងបួងសួង​ដល់វិញ្ញាណក្ខ័ន្ធ​យុទ្ធជន និងជនរួមជាតិខ្មែរទាំងអស់ ដែលបានពលីជីវិត និងបាត់បង់​ជីវិត​ក្នុង​បុព្វហេតុ​រំដោះ​ជាតិ​មាតុភូមិ ចេញពីរណ្តៅមរណៈនៃបនប្រល័យពូជសាសន៍ ៣ឆ្នាំ ៨ខែ និង២០ថ្ងៃផងដែរ។ មួយវិញទៀត ឯកឧត្តម​ក៏សូម​ឱ្យ​មេរៀន​ឈឺចាប់​ទាំង​អស់​នេះ​ស្ថិត​ក្នុង​ការ​ចង​ចាំ​របស់​យុវជន​ជំនាន់​ក្រោយ ដើម្បីពួកគេអាចស្វែងយល់ពីតម្លៃនៃសុខសន្តិភាពមួយនេះ ដែលត្រូវបានតស៊ូ ពុះពារ ជម្នះឧបសគ្គជាច្រើនរយជំពូកទម្រាំអាចកសាង និងរក្សាបានមកដល់សព្វថ្ងៃនេះ។ សន្តិភាពដែលយើងកំពុងតែរស់នៅប្រកបដោយជីវភាពរុងរឿង សំបូរសប្បាយនាថ្ងៃនេះ កើតចេញពីការលះបង់ដ៏ធំធេងជាច្រើន និងការសម្រេចចិត្តក្នុងកាលៈទេសៈ​ដ៏លំបាកបំផុត​មួយកាលពី ៤៥ ឆ្នាំមុន របស់សម្តេចតេជោ ហ៊ុន សែន និងសមមិត្តដ៏ទុកចិត្តមួយចំនួនទៀត៕ អត្ថបទ៖ បាន ចក់