ភ្នំពេញ៖ ក្រសួងការងារ និងបណ្តុះបណ្តាលវិជ្ជាជីវៈ នឹងរៀបចំប្រារព្ធទិវាពិភពលោកដើម្បីសុវត្ថិភាព និងសុខភាពការងារ នៅថ្ងៃទី៥ ខែកក្កដាខាងមុខនេះ ក្នុងគោលបំណងដើម្បីលើកកម្ពស់ សុវត្ថិភាព និងសុខភាពការងារ និង​រំលឹក​ដល់​វិញ្ញាណក្ខន្ធ​កម្មករ​និយោជិត ដែលបានបាត់បង់ជីវិតដោយសារ​គ្រោះថ្នាក់ការងារ ​និង​ជំងឺវិជ្ជាជីវៈនៅលើពិភពលោក។

យោងតាមសេចក្តីជូនដំណឹង ស្តីពី “ការប្រារព្ធទិវាពិភពលោក ដើម្បីសុវត្ថិភាពនិងសុខភាពការងារ ២៨ មេសា ២០២២” ក្រសួងការងារ និងបណ្តុះបណ្តាលវិជ្ជាជីវៈ ​បានបញ្ជាក់ថា ​នេះជាឆ្នាំទី១៧ ដែល​ក្រសួងការងារ​នឹង​ប្រារព្ធទិវានេះឡើង ​ក្រោមប្រធានបទ “ធ្វើសកម្មភាពរួមគ្នាដើម្បីកសាង​វប្បធម៌​សុវត្ថិភាព និងសុខភាពការងារជាវិជ្ជមាន” ដែល​នឹងរៀបចំឡើង នាខែកក្កដាក្រោយនេះ នៅខេត្តសៀមរាប ក្រោមការចូលរួមជាអធិបតីភាព ឯកឧត្តមបណ្ឌិត អ៊ិត សំហេង រដ្ឋមន្រ្តីក្រសួងការងារ និងបណ្តុះបណ្តាលវិជ្ជាជីវៈ និងមានអ្នកចូលរួមមកពីស្ថាប័នពាក់ព័ន្ធ តំណាង​និយោជក តំណាងសហជីព និងកម្មករនិយោជិតសរុបប្រមាណ ៧០០នាក់។

ជាមួយគ្នានេះ ដើម្បីរួមចំណែក្នុងការផ្សព្វផ្សាយ និងលើកកម្ពស់សុវត្ថិភាព និងសុខភាពការងារ និង​បង្ការគ្រោះថ្នាក់ការងារ និងជំងឺវិជ្ជាជីវៈ ជាយថាហេតុដល់បងប្អូនកម្មករនិយោជិត ក្រសួងការងារ បានអំពាវនាវឲ្យរោងចក្រ សហគ្រាសទាំងអស់ ដែលបានបោះទីតាំងនៅតាមបណ្តារាជធានី ខេត្ត ត្រូវរៀបចំចងបដាពាក្យស្លោកមួយចំនួននៅតាមរបងខាងមុខរោងចក្រ សហគ្រាស ដើម្បីចូលរួម​អបអរសាទរទិវានេះ​ ដែលពាក្យស្លោកទាំងនោះ មានដូចជា៖ មានសុវត្ថិភាព​ គឺគ្មានគ្រោះថ្នាក់​ការងារ, រួមគ្នាកាត់បន្ថយគ្រោះថ្នាក់ការងារ ​និងជំងឺវិជ្ជាជីវៈ និងធានាឲ្យគ្រប់កន្លែងការងារ​នៅកម្ពុជា​មានសុវត្ថិភាព។ល។

សូមបញ្ជាក់ថា ទិវាពិភពលោកដើម្បីសុវត្ថិភាព និងសុខភាពការងារ កាលពីឆ្នាំ២០២១ បានប្រារព្ធ​ធ្វើឡើង​ទៅតាមប្រព័ន្ធ អនឡាញ ​ក្រោមប្រធានបទ “ត្រៀមទុកជាមុន ​រៀបចំឆ្លើយតបទៅនឹងវិបត្តិ៖ ស្តារឡើងវិញ​នូវប្រព័ន្ធគ្រប់គ្រងសុវត្ថិភាព​ និងសុខភាពការងារជាតិប្រកបដោយប្រសិទ្ធភាព” ក្នុង​គោលបំណង​ដើម្បីចូលរួមផ្សព្វផ្សាយពីស្ថានភាព​ និង​ទំហំ​បញ្ហានៃគ្រោះថ្នាក់ការងារ និង​ការ​បាត់បង់​ជីវិតរបស់កម្មករនិយោជិត ​ជាពិសេសផល​ប៉ះពាល់​ទៅនឹង​ស្ថានភាពសេដ្ឋកិច្ចគ្រួសារ និង​សង្គមជាតិ៕អត្ថបទ៖បូរ៉ាវី