ភ្នំពេញ៖ នាថ្ងៃ​ទី២០ មិថុនា ម្សិលមិញ ឯកឧត្តមបណ្ឌិត អូស្មាន ហាស្សាន់ ទេសរដ្ឋមន្ត្រីទទួលបន្ទុកបេសកកម្មពិសេស និងជាសមាជិកឧត្តមក្រុមប្រឹក្សាអង្គការសម្ព័ន្ធស្លាពិភពលោកហៅកាត់ថា (RABITA) បានជួបសំណេះសំណាលជាមួយឯកឧត្តម បណ្ឌិត មហាំម៉ាត់ អាប់ឌុលការីមអាល់អ៉ីសា (Muhammad Bin Abdulkarim Al-Issa) អគ្គលេខាធិការអង្គការសម្ព័ន្ធពិភពឥស្លាម (RABITA) មានសន្តិភាព។

ឯកឧត្តម បណ្ឌិត មហាំម៉ាត់ អាប់ឌុលការីមអាល់អ៉ីសា បានលើកឡើងថា រាជរដ្ឋាភិបាលកម្ពុជា បាននិងកំពុងផ្តល់ម្លប់ដ៏កក់ក្តៅ ពោពេញដោយមនោសញ្ចេតនាដ៏ជ្រាលជ្រៅ ចំពោះសាសនិកឥស្លាម ដែលលោកសូមធ្វើការវាយតម្លៃខ្ពស់ ចំពោះអ្វីដែលសាសនិកឥស្លាមទទួលបាន ដែលបង្ហាញពីគោលនយោបាយសុខដុមបនីយកម្មរបស់កម្ពុជា។

ឯកឧត្តមអគ្គលេខាធិការ បានបន្ថែមទៀតថា កម្ពុជាជាប្រទេសគំរូសម្រាប់ពិភពលោកទាំងមូល ដែលមានស្នាដៃក្នុងការកសាងសន្តិភាពប្រកបដោយប្រសិទ្ធភាព ជាប្រទេសដែលស្រលាញ់សន្តិភាព មានឈ្មោះល្បីល្បាញលើឆាកអន្តរជាតិ អ្នកកាន់សាសនាទាំងអស់ទទួលបានភាពកក់ក្តៅ និងគុណតម្លៃលើសិទ្ធនៃការរស់នៅ និងប្រតិបត្តិសាសនា។

ឯកឧត្តមទេសរដ្ឋមន្រ្តី អូស្មាន ហាស្សាន់ ក៏បានលើកឡើងពីវីរភាពរបស់សម្ដេចអគ្គមហាសេនាបតីតេជោ ហ៊ុន សែន ដែលបានដឹកនាំប្រទេសកម្ពុជាចេញពីសង្គ្រាមមកដល់ចំណុចនេះ គឺឆ្លងកាត់ការលះបង់ពលីមិនតិចតួចទេ ដៃម្ខាងការពារជាតិដៃម្ខាងអភិវឌ្ឍន៍ ជាពិសេសគោលនយោបាយឈ្នះឈ្នះរបស់សម្តេច រហូតមានការបង្រួបបង្រួមនិងការកសាងសន្តិភាពពេញលេញ រហូតមកដល់បច្ចុប្បន្ន។

ចំពោះសហគមន៍ឥស្លាម រាជរដ្ឋាភិបាលបានបង្កើតឲ្យមានគណៈចាងហ្វាងដែលជាស្ថាប័នកំពូល មានតួនាទីភារកិច្ចរៀបចំរចនាសម្ព័ន្ធគ្រប់គ្រងតាមបែបសាសនាចាប់ពីរាជធានី ខេត្ត/ក្រុង ស្រុក/ខណ្ឌ និងតាមបណ្តាម៉ាស្ជិទទូទាំងប្រទេស។ លើសពីនេះ​ រដ្ឋាភិបាលបានផ្តល់សិទ្ឌអោយខ្មែរឥស្លាមចូលរួមបម្រើការងារជាមួយរាជរដ្ឋាភិបាល នៅតាមបណ្តាក្រសួងស្ថាប័ន ទាំងនីតិបញ្ញត្តិ និងនីតិប្រតិបត្តិ។

សូមជំរាបជូនដែរថា អង្គការសម្ព័ន្ធពិភពឥស្លាម RABITA ជាអង្គការដ៏ធំមួយ ត្រូវបានបង្កើតឡើង នៅឆ្នាំ១៩៦២ ដោយ ព្រះចៅ ហ្វៃសល អាល់សាអ៊ូឌ ជាសមាជិកសង្កេតការណ៍របស់ អង្គការសហប្រជាជាតិ ( UN ) ជាសមាជិកសង្កេតការរបស់ អង្គការសហប្រតិបត្តិការឥស្លាម( OIC ) ដែលមានមានទីស្នាក់ការ នៅទីក្រុងម៉ាកាស់ (Makkah) ប្រទេសអារ៉ាប៊ីសាអូឌីត មានការិយាល័យរបស់ខ្លួនជាច្រើន ក្នុងបណ្ដាប្រទេសចំនួន ៩៥៕ អត្ថបទ៖ ម៉ក់​ រ៉េនីតា