ឧត្ដរមានជ័យ៖ ក្រោយការបើកច្រកព្រំដែនអូរស្មាច់ឡើងវិញ ប្រជាពលរដ្ឋក្នុងខេត្តឧត្ដរមានជ័យ បានសម្រុកទៅធ្វើ ប័ណ្ណឆ្លងព្រំដែន ដើម្បីចូលទៅប្រទេសថៃរកការងារធ្វើ និងបានស្នើឱ្យមន្ត្រីជំនាញ ដែលបម្រើការងារក្នុង ការិយាល័យអង្គភាពច្រកចេញចូលតែមួយជួយពន្លឿនការធ្វើប័ណ្ណនេះ។

ប្រជាពលរដ្ឋ បានស្នើឲ្យអង្គភាពច្រកចេញចូលតែមួយរបស់ខេត្តឧត្តរមានជ័យ ជួយពន្លឿនការងារ ធ្វើសៀវភៅឆ្លងដែន ឬហៅថាប័ណ្ណឆ្លងដែន (Boder Pass) និងកំណត់ពេលវេលាឲ្យបានច្បាស់លាស់ ដោយសារតែកន្លងមក ការផ្តល់សេវានេះមានការយឺតយ៉ាវ ពន្យាពេលយូរ ធ្វើឲ្យពួកគេដែល​នៅ​ក្នុងមូល ដ្ឋានស្រុកឆ្ងាយៗ មានការលំបាកក្នុងការធ្វើដំណើរមកទទួលយក។

លោក អាន់ សំអាត ប្រធានការិយាល័យអង្គភាពច្រកចេញចូលតែមួយខេត្តឧត្តរមានជ័យ បានឲ្យ ដឹងថា ចំពោះការធ្វើប័ណ្ណឆ្លងដែនជូនពលរដ្ឋ គឺធ្វើឱ្យតែប្រជាពលរដ្ឋរស់នៅក្នុង​ខេត្តឧត្តរមានជ័យ តែប៉ុណ្តោះ ក្នុងតម្លៃពីរម៉ឺនរៀល ក្នុងមួយប័ណ្ណ ។ ដោយឡែកចំពោះពលរដ្ឋ​នៅតាមបណ្តា​ខេត្តផ្សេង មិនអាចធ្វើបាននោះឡើយ ប៉ុន្តែចំពោះករណីចាំបាច់ អ្នកជំងឺមាន​សភាពធ្ងន់ធ្ងរ​ខ្លាំង​មកពីខេត្តផ្សេងៗនោះ អាជ្ញាធរខេត្ត អាចជួយសម្រួលធ្វើប័ណ្ណជូនបាន ដោយចំនួនមាន​កំណត់​តាម​ការជាក់ស្តែង។

លោកបានបញ្ជាក់ថា កន្លងមក ការធ្វើប័ណ្ណឆ្លងដែននេះ មានការយឺតយ៉ាវបន្តិច ដោយសារបញ្ហា បច្ចេកទេសម៉ាស៊ីន មានចំនួនតិច ក៏ប៉ុន្តែបច្ចុប្បន្ន អង្គភាពច្រកចេញចូលតែមួយ បានសម្រួល​រាល់បញ្ហា ប្រឈមនានាជូនពលរដ្ឋឲ្យបានឆាប់រហ័ស មិនឲ្យមានការយឺតយ៉ាវដូចពេលមុនទៀត​នោះឡើយ ដោយកំណត់ត្រឹមរយៈពេល៧ថ្ងៃ ពលរដ្ឋអាចទទួលយកប័ណ្ណឆ្លងដែនបានហើយ៕ អត្ថបទ៖ ឃិន សារិទ្ធ