កំពង់ឆ្នាំង ៖ ក្រុមការងារ​ចម្រុះថ្នាក់ខេត្តកំពង់ឆ្នាំង នៅថ្ងៃទី២៣ ខែមិថុនា ឆ្នាំ ២០២២នេះ ដឹកនាំដោយលោក សាន់ យូ អភិបាលរងខេត្តកំពង់ឆ្នាំង បានរៀបចំកិច្ចប្រជុំជាមួយក្រុមការងារចម្រុះ ដើម្បីពិនិត្យអំពីវឌ្ឍនភាពនៃផែនការរៀបចំការកាត់ឆ្វៀលដីតំបន់បី ផ្តល់ជូនប្រជាពលរដ្ឋ ក្នុងភូមិសាស្រ្តខេត្តកំពង់ឆ្នាំង ។  

លោក លី សុភា ប្រធានមន្ទីររៀបចំដែនដីនគររូបនីយកម្មសំណង់និងសុរិយោដីខេត្តកំពង់ឆ្នាំង បានឱ្យដឹងថា ដោយអនុវត្តតាមសេចក្តីណែនាំរបស់រាជរដ្ឋាភិបាល និង រដ្ឋបាលខេត្ត ក្រុមការងារចម្រុះរបស់ខេត្ត សហការជាមួយអជ្ញាធរមូលដ្ឋាន បានធ្វើការសិក្សាស្រាវជ្រាវ និង ធ្វើសេចក្តីសន្និដ្ឋានបឋម ក្នុងការកំណត់ភូមិសាស្រ្ត និង ការកំណត់អត្តសញ្ញាណកម្មសម្រាប់ប្រជាពលរដ្ឋដែលត្រូវទទួលបានកម្មសិទ្ធិស្របច្បាប់ ដែលរាជរដ្ឋាភិបាលប្រគល់ជូន ។ 

លោកលីសុភា បានឱ្យដឹងទៀតថា ការកំណត់ដោយអនុក្រឹត្យ គឺអនុវត្តទៅលើឃុំសំរោងសែន និង ឃុំផ្លូវទូក ដែលគ្រោងចុះបញ្ជីដីធ្លីផ្តល់ប័ណ្ឌកម្មសិទ្ធិ ជាដីលំនៅដ្ឋាន និងការបែងចែកដីអាស្រ័យផល ជូនប្រជាពលរដ្ឋ ។ ចំពោះការកំណត់អត្តសញ្ញាណកម្ម ដីតាមបណ្តោយផ្លូវជាតិលេខ៥០ សេ មានទំហំជាង១ម៉ឺ៥ពាន់ហិកតា ដាក់ជាដីអាស្រ័យផល ដែលមិនស្ថិតនៅក្នុងអនុក្រឹត្យ ដោយធ្វើការស្នើសុំរាជរដ្ឋាភិបាលដើម្បីផ្តល់សិទ្ធិស្របច្បាប់ជូនប្រជាពលរដ្ឋ ។

ដាក់ផែនការអនុវត្តអនុក្រឹត្យស្តីពីការកាត់ឆ្វៀលតំបន់បី នៅតាមភូមិសាស្រ្ត បណ្តោយផ្លូវជាតិលេខ៥ និង ភូមិសាស្រ្តឃុំពាមឆ្កោកស្រុកជលគិរី  ឃុំសំរោងសែន និង ឃុំផ្លូវទូក ស្រុកកំពង់លែង ខេត្តកំពង់ឆ្នាំង និង គម្រោងរៀបចំដីសម្បទានសង្គមកិច្ច នៅស្រុកសាមគ្គីមានជ័យ ខេត្តកំពង់ឆ្នាំង  ។ 

លោក សាន់ យូ អភិបាលរងខេត្តកំពង់ឆ្នាំង បានឱ្យដឹងថា នាពេលនេះក្រុមការងារចម្រុះរបស់ខេត្តបានអនុវត្តយ៉ាងពេញលេញតាមជំហាននីមួយ នៃនីតិវិធី ស្របតាមសេចក្តីជូនដំណឹងរបស់រាជរដ្ឋាភិបាល ក្នុងការកាត់ឆ្វៀលដី ដោយបានចុះពិនិត្យជាក់ស្តែង និងស្រង់នូវទិន្ន័យជាក់លាក់ សម្រាប់ការរៀបចំស្របច្បាប់ក្នុងការផ្តល់កម្មសិទ្ធិដី ជូនប្រជាពលរដ្ឋ ដែលបានរស់នៅលើទីលំនៅអចិន្រ្តៃច្បាស់លាស់ ។  

លោក បានបញ្ជាក់ទៀតថា រាល់ពេលអនុវត្តការងារ មន្រ្តីដែលជាក្រុមការងារទាំងអស់ ត្រូវតែចូលរួមដោយឆន្ទៈ អនុវត្តប្រកបដោយតម្លាភាព ប្រសិទ្ធភាព ជូនប្រមុខរាជារដ្ឋាភិបាល ក្នុងការកាត់ឆ្វៀលដីតំបន់បីនេះ ជូនប្រជាពលរដ្ឋដែលរស់នៅក្នុងមូលដ្ឋានពិតប្រាកដ ៕ អត្ថបទ ៖ ហុង វាស្នា