​រុស្ស៊ី៖ ក្រសួងការពារជាតិ​រុស្ស៊ី​កាលពី​ថ្ងៃ​សុក្របាន​បញ្ចេញ​វីដេអូ​ដែល​ខ្លួន​​និយាយថា បាន​បង្ហាញ​នូវ​មី​ស៊ី​ល TOS-1A ត្រូវបាន​បាញ់​ទៅលើ​ទីតាំង​របស់​ប្រទេស​អ៊ុយ​ក្រែ​ន​។ វីដេអូ​នោះបាន​បង្ហាញ​ពី​គ្រាប់​រ៉ុក្កែត​ដែល​ត្រូវបាន​បាញ់​ចេញពី​ទីវាល​មួយកន្លែង ហើយ​វីដេអូ​ថត​បាន​ពីលើ​អាកាស​បាន​បង្ហាញ​គ្រាប់​រ៉ុក្កែត​កំពុង​ផ្ទុះ​។

​

​មន្ត្រី​ជាន់ខ្ពស់​នៅក្នុង​រដ្ឋបាល​ដែល​តែងតាំង​ដោយ​រុស្ស៊ី​នៅ​ទីក្រុង Kherson របស់​អ៊ុយ​ក្រែ​ន​ត្រូវ​បានសម្លាប់​នៅ​ក្នុង​ការ​ធ្វើឃាត ដែល​ជា​ការវាយប្រហារ​ថ្មី​បំផុត​លើ​អាជ្ញាធរ​ដែល​គាំទ្រ​ដោយ​រុស្ស៊ី​។​ ​លោក Dmitry Savluchenko ប្រធាន​ផ្នែក​​គ្រួសារ យុវជន និង​កីឡា​នៃ​រដ្ឋបាល​យោធា​ស៊ីវិល​ទីក្រុង Kherson ត្រូវ​បាន​សម្លាប់​នៅ​ក្នុង​ការ​បំផ្ទុះ​គ្រាប់បែក​កាលពី​ថ្ងៃ​សុក្រ​។ រដ្ឋបាល​តំបន់​គាំទ្រ​រុស្ស៊ីនៅ​ទីក្រុង Kherson បាន​និយាយ​ថា​ លោក Dmitry Savlyuchenko បាន​ស្លាប់​នៅ​ពេល​ដែល​រថយន្ត​របស់​លោក​ត្រូវ​បាន​បំផ្ទុះ​។ ឧប្បត្តិ​ហេតុនេះ​ត្រូវ​បាន​អះអាង​ថា ​ជា​ការ​វាយប្រហារ​ភេរវកម្ម​។

​ទន្ទឹម​នឹង​នេះអ្នកនាំពាក្យ​ក្រសួងការពារជាតិ​រុស្ស៊ី​លោក Igor Konashenkov បាន​និយាយកាលពី​ថ្ងៃ​សុក្រ​ថា អ្នក​ប្រយុទ្ធ​អ៊ុយ​ក្រែ​ន​ប្រមាណ ២​ពាន់​នាក់​បាន​ជាប់​នៅ​ក្នុង​តំបន់ Hirske ចម្ងាយ ២០​គីឡូ​ម៉ែត្រ​ភាគ​ខាង​ត្បូង​ទីក្រុង ​Sievierodonetsk។ លោក​បាន​អះ​អាង​ថា អ្នក​ជាប់​រួមមាន​ទាហាន​ប្រមាណ ១,៨០០​នាក់បូករួម​ទាំង​ទាហាន​ស៊ីឈ្នួល​បរទេស​ ៨០​នាក់ ព្រមទាំង​អ្នក​ប្រយុទ្ធ​មកពី​ក្រុម​ផ្សេង​ទៀត៕

អត្ថបទ៖ ប៊ុនថន