កំពង់ឆ្នាំង៖ នាថ្ងៃទី២៧ ខែមិថុនា ឆ្នាំ២០២២ លោក សាន់ យូ អភិបាលរងខេត្តកំពង់ឆ្នាំង និងជា​ប្រធានក្រុមការងារចម្រុះខេត្ត លោក លី សុភា ប្រធានមន្ទីរដែនដី បាន​ដឹក​នាំ​កម្លាំង​ចម្រុះ​ចុះ​បង្ហាញ​ព្រំប្រទល់ដីលំនៅដ្ឋានប្រជាជនចំនួន ១១៧២គ្រួសារ ដែលបានកំណត់​ក្នុង​អនុក្រឹត​លេខ​១១២ អនក្រ.បក ចុះថ្ងៃទី០២ ខែមិថុនា ឆ្នាំ២០២២ នៅក្នុងភូមិស្លត ភូមិពាមខ្នង ភូមិ​ថ្នល់​ឈើទាល ឃុំផ្លូវទូក ស្រុកកំពង់លែង។

លោក សាន់ យូ បានណែនាំអោយអាជ្ញាធរភូមិឃុំ សិក្សា​ពិនិត្យ​អោយ​បានច្បាស់លាស់​អំពី​ដីឡូត៍​លំនៅដ្ឋាន​ប្រជាជន ក្បាលដីរដ្ឋបាល ដូចជាដីសាលារៀន ដីវត្តអារាម ដីប៉ុស្តរដ្ឋបាលដីសាលាឃុំ នៅអមផ្លូវ​ព្រះរាមក្នុងឃុំផ្លូវទូក។ ម្យ៉ាងទៀតត្រូវរៀបចំដីឡូត៍បន្ថែម សម្រាប់ជូនប្រជាជន​ដែល​មិន​ទាន់​បាន​មក​តាំងទីលំនៅ ដែលជាអ្នកមានបញ្ជីឈ្មោះត្រឹមត្រូវរបស់ភូមិឃុំខាងលើ ស្របតាម​ការ​សម្រេច​របស់រាជរដ្ឋាភិបាល។

បន្ទាប់មកលោកប្រធានក្រុមការងារចម្រុះខេត្ត បានដឹកនាំក្រុមការងារចុះទៅភូមិសំរោងសែន និង​ភូមិ​ប៉ប្រក ឃុំសំរោងសែន ស្រុកកំពង់លែង ដើម្បីកំណត់ព្រំប្រទល់ដីលំនៅដ្ឋាន ដីអាស្រ័យផល ដែល​រាជរដ្ឋាភិបាលបានសម្រេចប្រគល់ជូនប្រជាជនចំនួន ៥១៦គ្រួសារ និងស្នើ​អោយ​អាជ្ញាធរ និង​មន្ទីរ​ជំនាញពាក់ព័ន្ធ ពន្លឿនរៀបចំជូនប្រជាជន៕ អត្ថបទ៖ ហុង វាស្នា