ភ្នំពេញ៖ ជាថ្មីម្តងទៀតប្រធានគណៈកម្មការចំពោះកិច្ចចាក់វ៉ាក់សាំងបង្ការជំងឺកូវីដ-១៩ ក្នុងក្របខណ្ឌទូទាំងប្រទេស បានក្រើនរម្លឹកដល់ប្រជាពលរដ្ឋដល់វេនចាក់វ៉ាក់សាំងដូសជំរុញ សូមរួសរាន់ទៅទទួលការចាក់ វ៉ាក់សាំង បើទោះបច្ចុប្បន្ន ប្រទេសកម្ពុជា លែងរកឃើញអ្នកឆ្លងជំងឺកូវីដថ្មីជិត២ខែក្តី។

នៅថ្ងៃទី២៧ ខែមិថុនានេះលោកជំទាវវេជ្ជបណ្ឌិត ឱ វណ្ណឌីន ប្រធានគណៈកម្មការចំពោះកិច្ច ចាក់វ៉ាក់សាំងបង្ការជំងឺកូវីដ-១៩ ក្នុងក្របខណ្ឌទូទាំងប្រទេសបានប្រាប់BTVថា បើទោះបីបច្ចុប្បន្ន ស្ថានភាពជំងឺកូវីដ-១៩ នៅក្នុងប្រទេសកម្ពុជា មានភាពល្អប្រសើរក្តី តែការចាក់វ៉ាក់សាំងនៅតែ​មាន​សារសំខាន់ជាពិសេសដូសជំរុញ។

ការចាក់វ៉ាក់សាំងដូសជំរុញ គឺដើម្បីបង្កើនអង់ទីគ័រក្នុងសារពាង្គកាយ ទប់ទល់នឹង ការវាយលុក​ពី​ជំងឺកូវីដ-១៩ ជាពិសេសពពួកបំប្លែងថ្មីអូមីក្រុង ​និងដើម្បីធានានិរន្តរភាពយូរអង្វែង ក្នុងការ រស់​ធម្មតា​ជាមួយជំងឺកូវីដ-១៩។

បច្ចុប្បន្នប្រទេសកម្ពុជា ទទួលបានវ៉ាក់សាំងបង្ការជំងឺកូវីដ-១៩ ជាង៥០លានដូស ទាំងការបញ្ជា ទិញ ​ជំនួយពីយន្តការកូវ៉ាក់ ​និងបណ្តាប្រទេសមួយចំនួន រួមមាន ប្រទេសចិន ឥណ្ឌា ជប៉ុន អាមេរិក អង់គ្លេស អូស្រ្តាលី ប៉ូឡូញ ហុងគ្រី និងអ៊ីតាលី ។ល។

សម្រាប់ពលរដ្ឋ អាយុចាប់ពី៣ឆ្នាំឡើង មិនទាន់ទទួលបានការចាក់វ៉ាក់សាំងកូវីដ-១៩​ ចាប់ពីដូស មូលដ្ឋាន​ រហូតដល់ដូសជំរុញ ​អាចទៅទទួលការចាក់វ៉ាក់សាំងបាន នៅទីតាំងសុខាភិបាល​សាធារណៈ នៅ ​ទូទាំងប្រទេស ឬមូលដ្ឋានរស់នៅ ដែលរៀបចំដោយអាជ្ញាធរមូលដ្ឋាន ៕ អត្ថបទ៖ ទូច សោភ័ណ