​អឺរ៉ុប៖ ប្រមុខ​គោលនយោបាយ​វិសមភាព​របស់​អង្គការ Oxfam ក្រុម​ជំនួយ​សកល​លោក Max Lawson បាន​ប្រកាស​នៅ​ក្នុង​សេចក្ដីថ្លែងការណ៍​មួយ​ដែល​ចេញផ្សាយ​កាលពី​ថ្ងៃ​អង្គារ ដោយ​ថ្កោលទោស​ចំពោះ​ការ​ផ្ដល់​ប្រាក់​ត្រឹមតែ 4.5ពាន់​លាន​ដុល្លារ​ដែល​ប្រទេស​មហាអំណាច​បាន​សន្យា​ថា ​នឹង​ប្រយុទ្ធ​ប្រឆាំង​នឹង​វិបត្តិ​អត់ឃ្លាន​ដ៏​ធ្ងន់ធ្ងរ​បំផុត​នៅ​ក្នុង​រយៈពេល​ជាច្រើន​ទសវត្សរ៍​ថា ក្រុម​ប្រទេស​មាន​ឧស្សាហកម្ម​លូតលាស់​ទាំង​៧​ ឬ​ G7​ កំពុង​ធ្វើ​ឱ្យ​មនុស្ស​រាប់​លាន​នាក់​ស្លាប់​ដោយ​អត់​អាហារ និង​ដុត​បំផ្លាញ​ភព​ផែនដី​នេះ​។

​លោក Lawson បាន​ទទូច​ថា យើង​ត្រូវ​ការប្រាក់​ជា​ចាំបាច់​យ៉ាងហោចណាស់ 28.5​ពាន់​លាន​ដុល្លារ​បន្ថែម​ទៀត ក្នុង​ការ​ផ្តល់​ហិរញ្ញប្បទាន​ដល់​ការ​វិនិយោគ​លើ​ម្ហូបអាហារ និង​កសិកម្មដើម្បី​បញ្ចប់​ភាព​អត់ឃ្លាន និង​បំពេញ​ចន្លោះ​ដ៏​ធំ​នៅ​ក្នុង​ការ​អំពាវនាវ​មនុស្សធម៌​របស់​អង្គការសហប្រជាជាតិ​។ ប្រទេស G7 បាន​សន្យា​ផ្ដល់​ថវិកា​ប្រហែល 14​ពាន់​លាន​ដុល្លារ​ដើម្បី​ប្រយុទ្ធ​ប្រឆាំង​នឹង​អសន្តិសុខ​ស្បៀង​សកល​នៅ​ឆ្នាំនេះ រួម​ទាំង​ចំនួន​ដែល​បាន​សន្យា​កាលពី​ថ្ងៃ​អង្គារ​។

​យោង​តាម​សារព័ត៌មាន Politico ទោះ​យ៉ាង​ណា​ក៏ដោយ​គេ​មិន​ច្បាស់​ទេ​ថា​ ប្រាក់​ចំនួន​ប៉ុន្មានត្រូវ​បាន​ចែកចាយ​យ៉ាង​ពិត​ប្រាកដ​ដល់​អ្នក​ដែល​គួរ​ទទួល​បាន​។ ខណៈ​ដែល​សភា​អាមេរិក​បាន​អនុម័ត​កញ្ចប់​ថវិកា​សម្រាប់​ទិញ​សព្វាវុធ និង​ជំនួយ​ដ៏​សំខាន់​មួយ​សម្រាប់​អ៊ុយ​ក្រែ​ន​កាលពី​ខែ​មុន ដែល​រួម​បញ្ចូល​ទឹកប្រាក់​ចំនួន 5ពាន់​លាន​ដុល្លារ​ដើម្បី​ប្រយុទ្ធ​ប្រឆាំង​នឹង​ភាព​អត់ឃ្លាន​ជាស​កល​នោះ គ្មាន​កញ្ចប់​ថវិកា​សម្រាប់​ជួយសង្គ្រោះ​ភាព​អត់ឃ្លាន​ណាមួយ ​ត្រូវ​បាន​បញ្ជូន​ចេញ​ទេ​គិត​ត្រឹម​ចុង​សប្តាហ៍​មុន​នេះ៕

អត្ថបទ៖ សុខមាន