ភ្នំពេញ៖ ក្នុងរយៈពេលប៉ុន្មានឆ្នាំចុងក្រោយនេះ វិទ្យាស្ថានស្រាវជ្រាវ និងអភិវឌ្ឍន៍កសិកម្មកម្ពុជា ហៅកាត់ថា កាឌី បានសិក្សាស្រាវជ្រាវ និងរកឃើញនូវពូជស្រូវល្អៗ មានតម្លៃធន់អាកាសធាតុ និងពូជដំណាំជាច្រើនប្រភេទ ដើម្បីផ្ដល់ដល់កសិកម្ម ធ្វើការដាំដុះឲ្យបានគ្រប់ពេលវេលា។

ក្នុងសិក្ខាសាលាពិគ្រោះយោបល់ ស្តីពីការកំណត់អាទិភាពស្រាវជ្រាវ និងអភិវឌ្ឍបច្ចេកវិទ្យាកសិកម្ម នៅថ្ងៃទី២៩ ខែមិថុនា ឆ្នាំ២០២២ លោក ឡោ ប៊ុណ្ណា នាយកវិទ្យាស្ថានស្រាវជ្រាវ និងអភិវឌ្ឍន៍កសិកម្មកម្ពុជា បានលើកឡើងថា ក្នុងពេលកន្លងទៅនេះ វិទ្យាស្ថានបានប្រឹងប្រែងស្រាវជ្រាវជាច្រើន ពាក់ព័ន្ធនឹងការបញ្ចេញនូវពូជដំណាំល្អៗដល់កសិករ ដើម្បីបង្កើននូវទិន្នផល បង្កើននូវផលិតកម្មកសិកម្មនៅក្នុងប្រទេស និងបានប្រមូលនូវដំណាំចំនួន ៣៩ប្រភេទ សរុបជាង ៩០០០សំណាក យកទៅរក្សាទុក ដើម្បីជាប្រភពនៃពូជដំណាំ ក្នុងការស្រាវជ្រាវបន្ត និងបញ្ចេញទៅកសិករប្រើប្រាស់។

លោកបន្តថា ចំពោះពូជស្រូវវិញ វិទ្យាស្ថានបានបញ្ចេញចំនួន ៤៥ពូជ ដែលពូជទាំងនោះ បានផ្សព្វផ្សាយដល់កសិករប្រើប្រាស់ ខណៈ ៥ឆ្នាំចុងក្រោយមកនេះ បញ្ចេញនូវពូជស្រូវជាច្រើនប្រភេទ ឲ្យស្របទៅតាមទីផ្សារបច្ចុប្បន្ន ស្របទៅតាមក្សេតបរិស្ថានដាំដុះនៅកម្ពុជា ក្នុងនោះមានស្រូវសែនក្រអូបសេរ៉ូ១ មិនប្រកាន់រដូវ ដាំដុះក្នុងរយៈពេលខ្លី ពូជស្រូវខា១៥ និងខា១៦ ជាពូជស្រូវធន់នឹងកម្ដៅ ដោយពូជស្រូវទាំងអស់នេះ សុទ្ធតែមានសក្ដានុពលក្នុងការនាំចេញ រួមទាំងពូជដំណាំមួយចំនួនទៀត។

លោក ឡោ ប៊ុណ្ណា បានបញ្ជាក់ថា វិទ្យាស្ថានកាឌី គ្រោងនឹងបញ្ចេញនូវពូជដំឡូងមី ពូជដំឡូងឈ្វា ពូជល្ង និងពូជស្រូវមួយចំនួនទៀត ដែលអាចធន់នឹងកម្ដៅ ផ្ដល់ទិន្នផល្អ បន្ទាប់ពីមានការវាយតម្លៃ និងស្រាវជ្រាវរួច ដើម្បីជាប្រយោជន៍ក្នុងការលើកស្ទួយជីវភាពរបស់ពលរដ្ឋ។

ក្នុងឱកាសនោះ ឯកឧត្តមបណ្ឌិត មាស ពិសិដ្ឋ អនុរដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ អំពាវនាវទៅដល់ដៃគូអភិវឌ្ឍន៍ វិស័យឯកជនពាក់ព័ន្ធ នយកដ្ឋានជំនាញទាំងឡាយ និងមន្ទីរកសិកម្មគ្រប់រាជធានីខេត្ត ត្រូវបន្តធ្វើកិច្ចសហការប្រតិបត្តិការល្អជាមួយវិទ្យាស្ថានកាឌី ដែលជាចលករមួយលើកតម្កើងការប្រើប្រាស់បច្ចេកវិទ្យាកសិកម្ម ដើម្បីបង្កើតជាឧត្តមប្រយោជន៍ សំដៅបង្កើនសេដ្ឋកិច្ចកសិកម្ម ឲ្យមានកំណើនដោយចីរភាព និងនវានុវត្តន៍។

សិក្ខាសាលាពិគ្រោះយោបល់ស្តីពី ការកំណត់អាទិភាពស្រាវជ្រាវ និងអភិវឌ្ឍបច្ចេកវិទ្យាកសិកម្ម ឧបត្ថម្ភបច្ចេកទេស និងថវិកាដោយអង្គការ FAO រៀបចំឡើងក្នុងគោលបំណងផ្សព្វ ផ្សាយសមិទ្ធផលការងារស្រាវជ្រាវ ដែលវិទ្យាស្ថានសម្រេចបាននាពេលកន្លងមក ការកំណត់អាទិភាពស្រាវជ្រាវ និងអភិវឌ្ឍបច្ចេកវិទ្យាកសិកម្ម និងប្រមូលធាតុចូលសំខាន់ៗ ក្នុងការរៀបចំផែនការយុទ្ធសាស្ត្រស្រាវជ្រាវ និងអភិវឌ្ឍបច្ចេកវិទ្យាកសិកម្ម ឆ្នាំ២០២៣-២០២៧៕ អត្ថបទ៖ បាន សុខរិទ្ធិ