​​អ៊ុយ​ក្រែ​ន​៖ ប្រធានាធិបតី​អ៊ុយ​ក្រែ​ន​លោក Volodymyr Zelenskyy កាលពី​ថ្ងៃ​ពុធ​បានទទួល​ប្រធានាធិបតី​ឥណ្ឌូនេស៊ី​លោក Joko Widodo សម្រាប់​កិច្ចពិភាក្សា​នៅ​វិមាន Mariinskyi ក្នុង​ទីក្រុង Kyiv។ លោក Widodo និង​ភរិយា​បានធ្វើ​ដំណើរ​ទៅកាន់​ទីក្រុង Kyiv ក្នុង​គោលបំណង​ជួយ​ចាប់ផ្តើម​កិច្ចចរចា​សន្តិភាព​ឡើងវិញ​រវាង​រុស្ស៊ី​ និង​អ៊ុយ​ក្រែ​ន ព្រមទាំង​ការចូលរួម​ក្នុង​កិច្ចពិភាក្សា​ជុំវិញ​ការនាំចេញ​គ្រាប់​ធញ្ញជាតិ ​ទៅកាន់​ទីផ្សារ​ពិភពលោក​។

បច្ចុប្បន្ន​ប្រទេស​ឥណ្ឌូនេស៊ី​មាន​តួនាទី​ជា​ប្រធាន​ប្តូរ​វេន​នៃ​ក្រុម​ប្រទេស​ G20​។​ ​ប្រធានាធិបតី​អ៊ុយ​ក្រែ​ន​លោក Volodymyr Zelenskyy បាន​ទទួលយក​ការអញ្ជើញ​ពី​សម​ភាគី​ឥណ្ឌូនេស៊ី​លោក Joko Widodo ដើម្បី​ចូលរួម​ក្នុង​កិច្ចប្រជុំ​កំពូល G-20 នៅ​ចុង​ឆ្នាំនេះ​។ លោក Zelenskyy បាន​និយាយថា ការចូលរួម​របស់​អ៊ុយ​ក្រែ​ន​នៅក្នុង​កិច្ចប្រជុំ​កំពូល​នៅ​ប្រទេស​ឥណ្ឌូនេស៊ី​ នឹង​ផ្អែកលើសមាសភាព​នៃ​អ្នកចូលរួម និង​ស្ថានភាព​សន្តិសុខ​។ កាលពី​ពេលមុនលោក Widodo បាន​និយាយថា ប្រធានាធិបតី​រុស្ស៊ី​លោក Vladimir Putin ក្នុង​បំណង​ឲ្យ​ចូលរួម​កិច្ចប្រជុំ​កំពូល​នៅ​ខែវិច្ឆិកា​ឆ្នាំនេះ​នៅ​កោះ​បាលី​។ ថ្លែង​នៅក្នុង​សន្និសីទ​សារព័ត៌មាន​រួម​នៅ​ទីក្រុង Kyiv ជាមួយ​ប្រធានាធិបតី​ឥណ្ឌូនេស៊ី លោក Zelenskyy បាន​និយាយថា ប្រទេស​ទាំង២ បាន​ពិភាក្សាគ្នា​អំពី​វិបត្តិ​ស្បៀងអាហារ​ពិភពលោក​ ក្នុងអំឡុង​កិច្ចពិភាក្សា​ទ្វេភាគី ដោយ​លោក Zelenskyy បាន​ចោទប្រកាន់​រុស្ស៊ី​ថា ​គំរាម​ពិភពលោក​ចំពោះ​ភាពអត់ឃ្លាន​។

លោក Zelenskyy បាន​និយាយថា គ្រាប់​ធញ្ញជាតិ​រាប់​លាន​តោន​នៅក្នុង​ប្រទេស​អ៊ុយ​ក្រែ​ន ​គួរតែ​បាន​ទៅដល់​អ្នកប្រើប្រាស់​។ លោក Widodo បាន​និយាយ​ថា​ លោក​មានបំណង​ជំរុញ​លោក Putin និងលោក Zelenskyy ឱ្យ​ចាប់ផ្តើម​កិច្ចសន្ទនា​លើ​ការបញ្ចប់​សង្គ្រាម ដែល​សង្គ្រាម​នេះ​បណ្តាលឱ្យមាន​ការខ្វះខាត​ស្បៀងអាហារ​ នៅ​ទូទាំង​ពិភពលោក និង​ការកើនឡើង​តម្លៃ​ទំនិញ ដោយ​លោក​បាន​អញ្ជើញ​លោក Zelenskyy ឱ្យ​ចូលរួម​កិច្ចប្រជុំ​កំពូល​ជាមួយ​លោក ​Putin ខណៈ​អ៊ុយ​ក្រែ​ន​មិនមែនជា​សមាជិក​នៃ​វេទិការ​នេះឡើយ​៕

អត្ថបទ៖ ប៊ុនថន