ភ្នំពេញ៖ នៅព្រឹកថ្ងៃទី៣០ ខែមិថុនានេះ ក្រសួងទេសចរណ៍ និងក្រសួងអប់រំ យុវជន និងកីឡា បានរៀបចំពិធីប្រកាសផ្លូវការប្រើប្រាស់សៀវភៅទេសចរណ៍ថ្នាក់ទី១១ សម្រាប់បង្រៀន និងរៀន​ចំពោះសិស្សានុសិស្សថ្នាក់ទី១១ នៅតាមសាលារដ្ឋ និងឯកជន ចាប់ពីថ្ងៃបើកបរវេសនកាល​សិក្សាឆ្នាំក្រោយនេះតទៅ។

នៅក្នុងពិធីផ្សព្វផ្សាយ និងដាក់ប្រើប្រាស់សៀវភៅទេសចរណ៍ថ្នាក់ទី១១ នៅទីស្តីការក្រសួង​ទេសចរណ៍ ឯកឧត្តមបណ្ឌិត ថោង ខុន រដ្ឋមន្ត្រីក្រសួងទេសចរណ៍ ថ្លែងថា ការដាក់​បញ្ចូលកម្ម​វិធីសិក្សា​ទេសចរណ៍ទៅក្នុងកម្រិតសិក្សាចំណេះដឹងទូទៅនេះ​គឺជាទិសដៅយុទ្ធសាស្រ្ត​នៃ​ផែនការ​អភិវឌ្ឍធនធានមនុស្សក្នុងវិស័យទេសចរណ៍​ ដើម្បីចូលរួមជំរុញការបណ្តុះបណ្តាល និងលើក​កម្ពស់ធនធានអ្នកជំនាញទេសចរណ៍ ​ឱ្យឆ្លើយតបទាំងបរិមាណ​ និងគុណភាពស្របតាមតម្រូវការ អភិវឌ្ឍន៍ក្នុងវិស័យទេសចរណ៍។

ឯកឧត្តម អ៊ឹម កុច រដ្ឋលេខាធិការ ក្រសួងអប់រំ យុវជន និងកីឡា បានថ្លែងថា ​ជាក់ស្តែងបច្ចុប្បន្ន ក្រសួងអប់រំ​យុវជននិងកីឡា ​ដាក់បញ្ចូលកម្មវិធីសិក្សាទេសចរណ៍ ​តាំងពីថ្នាក់ទី៩ ហើយតាម​រយៈការ​ដាក់​បញ្ចូល​សៀវភៅ​ទេសចរណ៍ថ្នាក់ទី១១នេះ ​នឹង​ចូលរួមចំណែក​ជួយជម្រុញផ្តល់​ការ​បណ្តុះបណ្តាលជំនាញយុវជនក្នុងវិស័យទេសចរណ៍អោយបាន​ ២លាននាក់ នៅឆ្នាំបន្ត​បន្ទាប់​នេះតទៅ។

សម្រាប់ការដាក់កម្មវិធីសិក្សាទេសចរណ៍នៅតាមសាលារៀនរដ្ឋ ​និងឯកជននេះ ​បណ្តាលោកអ្នកគ្រូ និង​សិស្សានុសិស្សបានបង្ហាញការប្តេជ្ញាចិត្តនិងខិតខំរៀនសូត្រវិជ្ជាជីវៈទេសចរណ៍​នៅកម្ពុជា អោយ​បានល្អប្រទេស និងទាក់ទាញភ្ញៀវទេសចរណ៍។

បើតាមលោក ស៊ុន ប៊ុណ្ណា ប្រធាននាយកដ្ឋានអភិវឌ្ឍន៍​កម្មវិធីសិក្សានៃក្រសួងអប់រំ ​យុវជន និង​កីឡា ថ្លែងថា បច្ចុប្បន្នសៀវភៅទេសចរណ៍ថ្នាក់ទី១១ ​គឺបានបោះពុម្ភប្រមាណជាង៣ម៉ឺនច្បាប់ ហើយ​​ក្រសួងអប់រំ​បានចែកចាយទៅតាមបណ្តាសាលារៀនរដ្ឋទាំង​អស់នៅ​ទូទាំង​ប្រទេសរួចហើយ ខណៈសៀវភៅ​ទេសចរណ៍ថ្នាក់ទី១១ ​នេះដាក់ដំណើរការបង្រៀន និងរៀននៅតាមសាលារៀន​រដ្ឋ​ចាប់ពីថ្ងៃបើកបរវេសនកាលថ្មី ​ឆ្នាំសិក្សា២០២៣​ ឆ្នាំក្រោយនេះតទៅ៕ អត្ថបទ ស៊ុម សុខជា