​​ស្នូកឃ័រ៖ កីឡាករ​ស្នូកឃ័រ​អូស្ត្រាលី Neil Robertson បាន​ក្លាយជា​ជើងឯក​ការប្រកួត​ពានរង្វាន់ Tour Championship ក្រោយ​ជ័យជំនះ ១០-៤ហ្វ្រេ​ម​លើ​ជើងឯក​ពិភពលោក ៦សម័យ Ronnie O’Sullivan នៅ​វគ្គ​ផ្តាច់ព្រ័ត្រ​។

​​Neil Robertson ធ្វើបាន Century Break ៥ហ្វ្រេ​ម និង​ឈ្នះ ៦ហ្វ្រេ​ម​ផ្ទួនៗ​ក្នុងដំណាក់កាល​ទី២ នៅពេល​ល្ងាច​។ ​នេះ​ជា​ជើងឯក​ដែល​រាប់បញ្ចូល​ក្នុង​ព្រឹត្តិការណ៍ Ranking ទី២០ ក្នុង​អាជីព​សំរាប់​កីឡាករ​លំដាប់​លេខ៣ ពិភពលោក​រូបនេះ​។ ​ចំណែក Ronnie O’Sullivan បាន​រង​បរា​ជ័យ​ក្នុង​វគ្គ​ផ្តាច់ព្រ័ត្រ​ក្នុង​ព្រឹត្តិការណ៍ Ranking បែបនេះ​លើក​ទី៥ ហើយ​ក្នុង​រដូវ​កាល​នេះ​។ ​ជើងឯក​ពិភពលោក ៦សម័យ O’Sullivan ក៏បាន​បរាជ័យ​នៅ​វគ្គ​ផ្តាច់ព្រ័ត្រ Northern Ireland Open, Scottish Open, Welsh Open និង Players Championship ផងដែរ​។​

​​ចំណែក Neil Robertson ក្រោយ​ជ័យជំនះ​នេះ កីឡាករ​វ័យ ៣៩ឆ្នាំ​រូបនេះ​មាន​ជំនឿ​ចិត្តនឹង​អាច​ដណ្តើម​ជើងឯក​ពិភពលោក​បាន​ ដូចដែល​ធ្លាប់​ធ្វើបាន​កាលពី ១១ឆ្នាំមុន ខណៈ​ការប្រកួត​ស្នូកឃ័រ​ជើងឯក​ពិភពលោក​ឆ្នាំនេះ ​នឹង​ចាប់ផ្តើមនៅ​ខែក្រោយ​នេះហើយ​៕

​អត្ថបទ​៖​នាង សុភា​វុ​ធ