ភ្នំពេញ៖ លោកជំទាវវេជ្ជបណ្ឌិត យក់ សម្បតិ្ត រដ្ឋលេខាធិការក្រសួងសុខាភិបាល បញ្ជាក់ថា តាមការប៉ាន់ស្មាន នៅឆ្នាំ២០១៧ របស់អង្គការសុខភាពពិភពលោក នៅប្រទេសកម្ពុជា ចំនួនអ្នកដែលមានជម្ងឺរលាកថ្លើមរ៉ាំរ៉ៃប្រភេទវីរុស បេ គឺ៣% (៤៧៥ ០០០នាក់) និអ្នកកំពុងរស់នៅជាមួយជម្ងឺរលាកថ្លើមរ៉ាំរ៉ៃប្រភេទវីរុស សេ ១,៦% (២៥៧ ០០០នាក់) ហើយដែលអាចមានផលប៉ះពាល់ធ្ងន់ធ្ងរដូចជា៖ ជម្ងឺក្រិនថ្លើម និងមហារីកថ្លើម។

ដើម្បីឆ្លើយតប នឹងបញ្ហានេះលោកជំទាវវេជ្ជបណ្ឌិត យក់ សម្បតិ្ត សង្កត់ធ្ងន់ធ្ងរថា ថ្នាក់ដឹកនាំក្រសួង បានខិតខំប្រឹងប្រែងយ៉ាងខ្លាំងរួមមាន៖ ការបង្កើតឲ្យមានក្រុមការងារបច្ចេកទេសសម្រាប់ជំងឺថ្លើម អនុម័តផែនការយុទ្ធសាស្រ្តជាតិសម្រាប់ឆ្លើយតបទៅនឹងមេរោគថ្លើម បេ និងសេ និង​បានធ្វើបច្ចុប្បន្នភាព​ ការណែនាំអំពីការព្យាបាលជំងឺរលាកថ្លើម។

ទន្ទឹមនឹងនេះឱសថ ព្យាបាលជំងឺរលាកថ្លើម ដោយវីរុស ប្រភេទ បេ និងសេ ក៏ត្រូវបានដាក់ចូល​ក្នុង​បញ្ជីឱសថសារវន្តឆ្នាំ២០១៨ ផងដែរ។

បើតាមលោកវេជ្ជបណ្ឌិត លី សុវណ្ណ ប្រធាននាយកដ្ឋានប្រយុទ្ធជំងឺឆ្លង នៃក្រសួងសុខាភិបាល ឲ្យដឹងថា​ តាមការសិក្សាស្រាវជ្រាវរបស់អ្នកជំនាញសុខាភិបាល ​គឺជំងឺរលាកថ្លើមប្រភេទ បេ និង សេ នៅកម្ពុជាខ្ពស់នៅឡើយ។

បច្ចុប្បន្នដោយការខិតខំគាំទ្ររបស់រាជរដ្ឋាភិបាលក្រសួងសុខាភិបាល ​និងមន្រី្តជំនាញ បានធ្វើឲ្យ​ដំណើរ​ការរីកចម្រើនទៅមុខ មិនចាញ់​បណ្តាប្រទេសនានានៅក្នុងតំបន់នោះទេ។

លោកជំទាវវេជ្ជបណ្ឌិត យក់ សម្បតិ្ត បានសង្កត់ធ្ងន់ថា ​ក្រសួងសុខាភិបាល បានប្តេជ្ញា​និងធ្វើការ​ជាមួយដៃគូអភិឌ្ឍន៍នានា ​ដើម្បីដោះស្រាយបញ្ហា​ប្រឈម​ទាក់ទង ​នឹងជំងឺរលាកថ្លើមបង្កដោយ​សារវីរុស បេ និងសេ ​ដោយផ្តោតលើលើចក្ខុវិស័យ​គ្មានការឆ្លងមេរោគរលាកថ្លើមថ្មីនៅកម្ពុជា ដែល​ប្រជាជន​ដែលមានមេរោគរលាកថ្លើមរ៉ាំរ៉ៃ ​អាចទទួលបានសេវា ​ធ្វើរោគ​វិនិច្ឆ័យ​ ការព្យាបាល និងថែទាំដោយមានប្រសិទ្ធភាព មានតម្លៃសមរម្យ និងមានគុណភាពល្អ៕ អត្ថបទ រដ្ឋា