​អង់គ្លេស៖ នៅ​តំបន់ Salisbury Plain ទាហាន​មកពី​អង្គភាព​កងទ័ព​អង់គ្លេស បាន​បង្រៀន​កងកម្លាំង​អ៊ុយ​ក្រែ​ន​ពី​របៀប​ប្រើប្រាស់​កាំភ្លើង L119 ដែល​ត្រូវបាន​គេ​ស្គាល់​ជាទូទៅ​ថាជា​កាំភ្លើង​បាញ់​ផ្លោង​។ បុគ្គលិក​យោធា​បានធ្វើដំណើរ​ទៅ​ប្រទេស​អង់គ្លេស​ ដើម្បី​ទទួលបាន​ទំនុកចិត្ត​ និង​រៀន​ជំនាញ​ក្នុង​បំណង​ពង្រឹង​កិច្ចប្រឹងប្រែង​ផ្នែក​យោធា​ទប់ទល់​ជាមួយ​រុស្ស៊ី​។

ពួកគេ​កំពុង​ត្រូវបាន​បង្រៀន​ពី​របៀប​បាញ់​អាវុធ និង​គ្រាប់​រ៉ុក្កែត​ចម្ងាយ​ឆ្ងាយ ដោយ​សង្ឃឹមថា​នៅពេល​ត្រឡប់មក​ប្រទេស​កំណើត​របស់​ពួកគេ​វិញ​នឹងមាន​ទំនុកចិត្ត​បន្ថែមទៀត​។ ​ចក្រភព​អង់គ្លេស​កំពុង​ផ្តល់ជំនួយ​ដល់​អ៊ុយ​ក្រែ​ន ​រួមមាន​កាំភ្លើង​ចាស់ៗ​ដែល​អាច​បាញ់​បាន​ក្នុង​ចម្ងាយ ៧ម៉ា​យ ហើយ​ឧបករណ៍​បាញ់​គ្រាប់​រ៉ុក្កែត​ដែល​ពួកគេ​កំពុង​ត្រូវបាន​ហ្វឹកហ្វឺន​ប្រើប្រាស់ អាច​បាញ់​ដល់​គោលដៅ​ចម្ងាយ​ជាង ៥០ម៉ា​យ​។​ ​ទាហាន​អ៊ុយ​ក្រែ​ន​រាប់រយ​នាក់​ត្រូវបាន​បណ្តុះបណ្តាល​ក្នុង​រយៈពេល​ប៉ុន្មាន​សប្តាហ៍​កន្លងទៅនេះ ហើយ​រាប់ពាន់នាក់​ទៀត​នឹង​ទទួលបាន​ការហ្វឹកហាត់​។ ចក្រភព​អង់គ្លេស​នឹង​បញ្ជូន​ជំនួយ​ផ្នែក​យោធា​ក្នុង​ទឹកប្រាក់​ចំនួន 1ពាន់​លាន​ផោន ឬ​ 1.21ពាន់​លាន​ដុល្លារទៅ​ឲ្យ​កាន់​អ៊ុយ​ក្រែ​ន ដែល​នាំ​ឲ្យ​ជំនួយ​ផ្នែក​យោធា និង​សេដ្ឋកិច្ច​សរុប​របស់ខ្លួន​ចាប់តាំងពី​សង្គ្រាម​ចាប់ផ្តើម​មាន​រហូតដល់ 3.8ពាន់​លានផោន ឬ​ 4.6ពាន់​លាន​ដុល្លារ​។

រដ្ឋាភិបាល​និយាយថា ជំនួយ​ថ្មី​នេះ​គឺ​សម្រាប់​ឧបករណ៍​រួមមាន​ប្រព័ន្ធ​ការពារ​ដែនអាកាស យាន​ដ្រូ​ន និង​ឧបករណ៍អេឡិចត្រូនិក​ផ្សេងទៀត​សម្រាប់​សង្គ្រាម។​ ​នាយករដ្ឋមន្ត្រីលោក Boris Johnson បាន​ជំរុញ​ឱ្យ​សម្ព័ន្ធមិត្ត​នៅ​កិច្ចប្រជុំ​កំពូល​ NATO ក្នុង​ទីក្រុង Madrid ប្រទេស​អេស្ប៉ាញ ឲ្យ​គាំទ្រ​អ៊ុយ​ក្រែ​ន​កាន់តែខ្លាំង​ថែមទៀត​។ អង់គ្លេស​ជា​ប្រទេស​ផ្តល់​ជំនួយ​ផ្នែក​យោធា​ធំ​ទី​2 ដល់​អ៊ុយ​ក្រែ​នបន្ទាប់ពី​សហរដ្ឋអាមេរិក​។ វា​ក៏​ជា​ប្រទេសមួយ​ក្នុងចំណោម​សមាជិក 9ប្រទេសក្នុងចំណោម 30​ប្រទេសរបស់​អង្គការ ​NATO ​ដែល​បំពេញ​តាម​គោលដៅ​របស់​សម្ព័ន្ធក្នុងការ​ចំណាយ 2% នៃ​ផលិតផល​ក្នុងស្រុក​សរុប ​(GDP) លើ​វិស័យ​ការពារជាតិ៕

អត្ថបទ៖ ប៊ុនថន