​រុស្ស៊ី៖ ប្រធានាធិបតី​រុស្ស៊ីលោក Vladimir Putin បាន​និយាយ​កាលពី​ថ្ងៃ​ព្រហស្បតិ៍​ថា វិធានការ​គឺចាំបាច់​សម្រាប់​ស្ថានភាព​ជុំវិញ​វិបត្តិ​ស្បៀងអាហារ​ពិភពលោក កុំឱ្យ​វា​ក្លាយទៅជា​សោកនាដកម្ម​។

​ថ្លែង​ក្នុង​ទីក្រុង​មូ​ស្គូអំឡុង​ជំនួប​ជាមួយ​ប្រធានាធិបតី​ឥណ្ឌូនេស៊ី​លោក Joko Widodo ដែល​មក​បំពេញ​ទស្សនកិច្ច​បាន​បង្ហាញ​ការ​ព្រួយបារម្ភចំពោះ​ការ​ដឹក​ជញ្ជូន​គ្រាប់​ធញ្ញជាតិ​របស់​អ៊ុយ​ក្រែ​ន លោក ​Putin បាន​អះអាង​ជាថ្មី​ម្តង​ទៀត​ថា ​រុស្ស៊ី​មិន​ជ្រៀតជ្រែក​ឡើយ​។ លោក​បាន​ដាក់​កំហុស​លើ​យោធា​អ៊ុយ​ក្រែ​ន​ជាថ្មី​ម្តងទៀត ​ចំពោះ​ការ​មិន​ចូល​ទៅ​ដោះ​គ្រាប់មីន​នៅ​កំពង់ផែ​របស់​ខ្លួន​។ គ្មាន​នរណា​ម្នាក់​រារាំង​ពួកគេ​មិន​ឲ្យ​ដោះ​គ្រាប់មីន និង​នាំ​នាវា​ដឹក​គ្រាប់​ធញ្ញជាតិ​ចេញ​នោះទេ យើង​ធានា​សុវត្ថិភាព​របស់​ពួកគេ​។​ ​ជាមួយគ្នានេះ ក្រសួងការពារជាតិ​រុស្ស៊ី​បាន​និយាយ​កាលពី​ថ្ងៃ​ព្រហស្បតិ៍​ថា ខ្លួន​បាន​ដក​កងកម្លាំងចេញពី​កោះ​នៅ​សមុទ្រ​ខ្មៅ​ក្បែរ​កំពង់ផែ Odesa របស់​អ៊ុយ​ក្រែ​ន​។ អ្នកនាំពាក្យលោក Igor Konashenkov បាន​និយាយថា ខ្លួន​បាន​ដក​កងកម្លាំង​ចេញពី​កោះ Zmiyinyi (​កោះពស់​) កាលពី​ថ្ងៃ​ព្រហស្បតិ៍ ជា​អ្វីដែល​ខ្លួន​បាន​ចាត់ទុកថា​ជា​ទង្វើ​នៃ​សុច្ឆន្ទៈ​។​

​លោក Konashenkov បាន​និយាយថា ការដក​កម្លាំង​ចេញ​នេះបានបង្ហាញ​ឱ្យឃើញថា សហព័ន្ធរុស្ស៊ី​មិនបាន​រារាំង​ដល់​កិច្ចប្រឹងប្រែង​របស់​អង្គការសហប្រជាជាតិ​ ក្នុង​ការរៀបចំ​ច្រករបៀង​មនុស្សធម៌ដើម្បី​នាំចូល​ទំនិញ​កសិកម្ម​ពី​ទឹកដី​អ៊ុយ​ក្រែ​ន​នោះទេ​។ អ៊ុយ​ក្រែ​ន និង​ប្រទេស​លោកខាងលិចបាន​ចោទប្រកាន់​រុស្ស៊ី​ថា ​បាន​បិទ​ច្រក​កំពង់ផែ​របស់​អ៊ុយ​ក្រែ​ន​ដើម្បី​រារាំង​ការនាំចេញ​គ្រាប់​ធញ្ញជាតិ​ ដែល​បានរួម​ចំណែក​ដល់​វិបត្តិ​ស្បៀងអាហារ​ពិភពលោក​។ ប្រទេស​រុស្ស៊ី​បាន​បដិសេធ​ការចោទប្រកាន់​នេះ ហើយ​បាន​និយាយថា ​អ៊ុយ​ក្រែ​ន​ចាំបាច់​ត្រូវ​ដោះ​គ្រាប់មីន​នៅ​សមុទ្រ​ខ្មៅ ដើម្បី​អនុញ្ញាត​ឲ្យ​មានការ​ដឹកជញ្ជូន​តាម​សមុទ្រ​ដោយ​សុវត្ថិភាព៕

អត្ថបទ៖ ប៊ុនថន