កំពង់ស្ពឺ៖ ព្រឹកថ្ងៃទី០១ ខែកក្កដា ឆ្នាំ២០២២ ឯកឧត្តមទេសរដ្ឋមន្រ្តី លី ធុជ អនុប្រធានទី១ អាជ្ញាធរមីន ចុះពិនិត្យលទ្ធផល​បោសសម្អាតមីន​ស្ថិតក្នុងភូមិវាល ឃុំស្រង់ ស្រុងគងពិសី ខេត្តកំពង់ស្ពឺ ក្រោមការឧបត្ថម្ភគាំទ្រពីអង្គភាព Khmer Times និងសហការី ដើម្បីធ្វើការបោសសម្អាតមីនឲ្យអស់ក្នុងភូមិ និងប្រកាសភូមិវាល ជាភូមិអស់មីន។

គម្រោងនេះ បានធ្វើការបោសសម្អាតលើផ្ទៃដីចំនួន ៥៣.៨៥៣ ម៉ែត្រក្រឡា និងមានអ្នកទទួល​ផល​ប្រមាណ ៣៨គ្រួសារ ដោយប្រតិបត្តិការបោសសម្អាតដោយកម្លាំងរបស់មជ្ឈមណ្ឌលជាតិ​គ្រប់គ្រង​កងកម្លាំងរក្សាសន្តិភាព បោសសម្អាតមីន និងកាកសំណល់សង្រ្គាម (NPMEC) ប្រើប្រាស់រយៈពេល ១២ថ្ងៃ។

ក្នុងនាមរាជរដ្ឋាភិបាលកម្ពុជា ឯកឧត្តមទេសរដ្ឋមន្រ្តី លី ធុជ បានថ្លែងអំណរគុណយ៉ាង​ជ្រាលជ្រៅ​ជូនចំពោះអង្គភាព Khmer Times និងសហការី ដែលបានចំណាយធនធានផ្ទាល់ខ្លួន ក្នុងការរួម​ចំណែក​ជាមួយរាជរដ្ឋាភិបាលកម្ពុជា ​តាមរយៈអាជ្ញាធរមីន ក្នុងការ​បញ្ចប់​ការ​គំរាមកំហែង​ដោយ​សារមីននៅតាមភូមិនីមួយៗ តាមលទ្ធភាព និងធនធានដែលខ្លួនមាន។

តាមរយៈការអនុវត្តយន្តការភូមិអស់មីន ឯកឧត្តមទេសរដ្ឋមន្រ្តី បានសង្ឃឹមយ៉ាងមុតមាំថា នឹង​មានវិស័យឯកជន ​និងសប្បុរជននានា ​ជាច្រើនទៀត ​ចូលរួមជាមួយរដ្ឋាភិបាល ក្នុងការងារបោស​សម្អាតមីនមនុស្សធម៌ ​ដើម្បីផ្តល់សុខសុវត្ថិភាព ​និងលើកកម្ពស់ជីវភាពរស់នៅរបស់ប្រជាពលរដ្ឋ​នៅតាមមូលដ្ឋាន៕