ស្វាយរៀង៖ បើទោះជាជំងឺកូវីដ-១៩នៅខេត្តស្វាយរៀង មិនទាន់មានផ្ទុះឡើងវិញនៅក្នុងសហគមន៍ ឬ នៅ តាមរោងចក្រ សហគ្រាស ក៏ពិតមែន តែវិធាន៣ការពារ និង៣កុំ ត្រូវបានកម្មករ កម្មការិនី បន្ត អនុវត្តយ៉ាងខ្ជាប់ខ្ជួន ។
លោក អ៊ូ សុខឿន ប្រធានមន្ទីរការងារ និងបណ្ដុះបណ្ដាលវិជ្ជាជីវៈ ខេត្តស្វាយរៀង បានឱ្យដឹងថា កម្មករ កម្មការិនី នៅខេត្តស្វាយរៀង រហូតមកដល់បច្ចុប្បន្ននេះ បានបន្តអនុវត្តវិធាន ៣ការពារ និង៣កុំ បានយ៉ាងខ្ជាប់ខ្ជួន តាមរយៈពាក់ម៉ាសលាងសម្អាតដៃមុនពេលចូលបម្រើការងារ និង ពេលជួបជុំគ្នានៅក្រៅបរិវេណ ពិសេសនៅលើមធ្យោបាយដឹកជញ្ជូនពេលចូលទៅបម្រើការងារ និង ពេលចេញពីបម្រើការងារវិលត្រឡប់មកជួបជុំគ្រួសារវិញ។
លោកប្រធានមន្ទីរ បានបញ្ជាក់ថា បន្ទាប់ពីរាជរដ្ឋាភិបាលបានបង្កើតឲ្យមានតំបន់សេដ្ឋកិច្ច ពិសេស នៅឆ្នាំ២០០៥ មកដល់បច្ចុប្បន្ន ខេត្តមានតំបន់សេដ្ឋកិច្ចពិសេសចំនួន១២ទីតាំង ហើយ បាននឹងកំពុងដំណើរការចំនួន៩ទីតាំង ដោយមានកម្មករកម្មការិនីបម្រើការងារជាង៩ម៉ឺននាក់ នៅ ក្នុងវិបត្តិជំងឺកូវីដ-១៩ កម្មករកម្មការិនីប្រមាណតែ១ឬ២%ប៉ុណ្ណោះ ដែលបាននឹងរងជំងឺ covid-១៩៕អត្ថបទ៖ ភា សារិត