ភ្នំពេញ៖ កម្ពុជាចាប់ផ្ដើមមានករណីឆ្លងកូវីដ-១៩ ជាថ្មី ក្នុងរយៈពេលប៉ុន្មានថ្ងៃចុងក្រោយនេះ ជាក់ស្ដែងគឺចាប់ផ្ដើមរកឃើញកាលពីថ្ងៃទី ២៨ មិថុនាមក។ ក្រោយការរកឃើញករណីឆ្លងបែបនេះ ចំនួនប្រជាពលរដ្ឋទៅទទួលចាក់វ៉ាក់សាំងនៅតាមមន្ទីរពេទ្យក៏មានការកើនឡើងផងដែរ។

ប្រទេសកម្ពុជា មានការរកឃើញនូវករណីឆ្លងកូវីដ-១៩ ជាថ្មី ក្រោយពុំមានករណីឆ្លង​រយៈពេលជិត​២ខែមកនេះ។

ក្រោយការឃើញករណីឆ្លងជាថ្មីនេះ ចំនួនប្រជាពលរដ្ឋទៅទទួលការចាក់វ៉ាក់សាំងដូសជំរុញ ក៏កើន​ឡើង ជាក់ស្ដែងសម្រាប់មន្ទីរពេទ្យបង្អែកច្បារអំពៅ ចាប់តាំងពីថ្ងៃទី ២៩ មិថុនា មកទល់ពេល​នេះ គឺមានប្រជាពលរដ្ឋមកចាក់វ៉ាក់សាំងប្រមាណ ៥០០នាក់រៀងរាល់ថ្ងៃ។ នេះជាការបញ្ជាក់របស់លោកវេជ្ជបណ្ឌិត សុខ កុសលពិសិដ្ឋ។ លោកវេជ្ជបណ្ឌិតបន្តថា កាលពេលមិនទាន់មានករណីឆ្លងថ្មី គឺពុំមានពលរដ្ឋមកចាក់វ៉ាក់សាំងច្រើននោះទេ។

នៅទីតាំងមន្ទីរពេទ្យបង្អែកច្បារអំពៅថ្ងៃនេះ គឺប្រជាពលរដ្ឋចម្រុះក្រុមអាយុ ទាំងចាស់ទាំងក្មេង មកទទួលការចាក់វ៉ាក់សាំងដូសជំរុញ។ ពួកគាត់លើកឡើងដែរថា ការចាក់វ៉ាក់សាំងគ្រប់​ដូសតាម​ការកំណត់ គឺជារឿងចាំបាច់ដើម្បីការពារសុខភាព។ ពួកគាត់ក៏សប្បាយចិត្ត ដែលរាជរដ្ឋាភិបាល​នៅតែបន្តផ្ដល់ការចាក់វ៉ាក់សាំងដោយមិនគិតថ្លៃ។

ជុំវិញរឿងចាក់វ៉ាក់សាំង កម្ពុជាជាប្រទេសឈានមុខមួយដែលសម្រេចបានជោគជ័យធំធេង ក្នុងការ​ចាក់វ៉ាក់សាំង ជូបប្រជាពលរដ្ឋ។ ជាក់ស្ដែងគិតត្រឹមថ្ងៃទី ១ ខែកក្កដា គឺ​សម្រេច​ការ​ចាក់វ៉ាក់សាំង​បានចំនួន ​៩៤,៣០% នៃប្រជាពលរដ្ឋសរុប ​១៦លាននាក់៕ អត្ថបទ៖ គឹមហុក