ភ្នំពេញ៖ UNDP ចូលរួមអបអរសាទរដល់រាជរដ្ឋាភិបាលកម្ពុជាដែលបានកៀរគរមូលនិធិសំខាន់ៗពីវិស័យឯកជន និងកាកបាទក្រហមកម្ពុជាដើម្បីគាំទ្រដល់ការបោសសម្អាតមីន ដែលបានចុះផ្សាយនៅថ្ងៃទី០១ ខែកក្កដា ឆ្នំា២០២២ នេះ។
សកម្មភាពមីន មិនត្រឹមតែជាការបោសសម្អាតមីនឲ្យអស់ពីផ្ទៃដីដែលមានគ្រាប់មីននោះទេ សកម្មភាពមីន ផ្តោតការយកចិត្តទុកដាក់ដល់ប្រជាជន និងសង្គម រួមទាំងលទ្ធភាពនានាសម្រាប់ពួកគេក្នុងការទទួលបានជីវិតរស់នៅប្រកបដោយសេចក្តីថ្លៃថ្នូរ និងភាពរុងរឿង។
បច្ចុប្បន្ននេះ ប្រជាជនជិតមួយលាននាក់ទូទាំងព្រះរាជាណាចក្រកម្ពុជាកំពុងប្រឈមនឹងហានិភ័យ ខណៈពេលដែលពួកគេរស់នៅ និងប្រកបរបរ និង ធ្វើការងារក្នុងតំបន់ដែលមានគ្រាប់មីន និងយុទ្ធភ័ណគ្រឿងផ្ទុះសល់ពីសង្គ្រាម ដែលនៅតែបន្តសម្លាប់មនុស្ស ធ្វើឲ្យរងរបួស និងធ្វើឲ្យសហគមន៍មានការភ័យខ្លាច។ ទាំងនេះ បានរារាំងដល់ការអភិវឌ្ឍ និងការស្តារឡើង និងបង្កការរំខានដល់ជីវភាពរស់នៅរបស់ប្រជាជនក្នុងតំបន់ជនបទ។
ក្រោមការដឹកនាំរបស់ អាជ្ញាធរមីន - Cambodian Mine Action Authority (CMAA) ដែលត្រូវបានតែងតាំងដោយរាជរដ្ឋាភិបាលកម្ពុជាក្នុងការគ្រប់គ្រងមូលនិធិសកម្មភាពមីន ការគាំទ្រនេះនឹងពន្លឿនកិច្ចការរួមនៃការកសាងសន្តិភាព ការអភិវឌ្ឍ និងការងារមនុស្សធម៌ ដែលធានាដល់សុខមាលភាពផ្លូវចិត្ត ស្ថេរភាពសេដ្ឋកិច្ច និងសង្គម និងផ្តល់ផ្ទៃដីសុវត្ថិភាពដល់សហគមន៍សម្រាប់ប្រើប្រាស់។
ជាលទ្ធផល វានឹងបង្កើតជាមារគាសម្រាប់កិច្ចការស្តារឡើងវិញដែលផ្តល់ជាប្រយោជន៍ផ្នែកបរិស្ថាន សេដ្ឋកិច្ច និងសង្គម។
UNDP បានត្រៀមខ្លួនបន្តជួយគាំទ្រដល់រាជរដ្ឋាភិបាលកម្ពុជា និងអជ្ញាធរមីន។
UNDP ចង់ឃើញសមិទ្ធិផលដ៏ធំធេងក្នុងសកម្មភាពមីននេះ ដោយសង្ឃឹមថានឹងមានការចែករំលែកការអនុវត្តល្អៗទាំងនេះ ក្នុងអំឡុងពេលនេះការប្រារព្ធខួប ៣០ឆ្នាំ នៃសកម្មភាពមីននៅក្នុងព្រះរាជាណាចក្រកម្ពុជា និងក្នុងព្រឹត្តិការសកល និងថ្នាក់តំបន់នានាដែលបានគ្រោងទុកសម្រាប់សកម្មភាពមីនក្នុងឆ្នាំនេះ។
UNDP ជម្រុញឲ្យមានការបន្តចូលរួមចំណែកពីដៃគអភិវឌ្ឍន៍នានា និងវិស័យឯកជនក្នុងការអភិវឌ្ឍជាតិ ដើម្បីសម្រេចបានគោលដៅកម្ពុជាគ្មានគ្រាប់មីនត្រឹមឆ្នាំ ២០២៥ របៀបវារៈឆ្នាំ ២០៣០ និងការដែលមិនមាននរណាម្នាក់ត្រូវបានគេទុកចោល៕