ភ្នំពេញ៖ អាជ្ញាធរជាតិព្រះវិហារ នៃក្រសួងវប្បធម៌ និងវិចិត្រសិល្បៈ សហការជាមួយសាកល​វិទ្យាល័យ​ភូមិន្ទវិចិត្រសិល្បៈ សាកលវិទ្យាល័យន័រតុន និងសាកលវិទ្យាល័យ Limkokwing បានរៀបចំ​ប្រកាស​ជ័យលាភី​ការ​ប្រកួតប្រជែង​ស្នាដៃ​រចនា​ផ្ទាំង​ផ្សព្វផ្សាយស្តីពី​ការ​អបអរសាទរ​គម្របខួបលើកទី១៤ ​នៃការចុះបញ្ជីប្រាសាទព្រះវិហារ​ ជាបេតិកភណ្ឌពិភពលោក​ (៧ កក្កដា ២០០៨-៧ កក្កដា ២០២២) ​នាព្រឹកថ្ងៃទី៤ ខែកក្កដា ឆ្នាំ២០២២នេះ។

ឯកឧត្តម ហេង សុផាឌី សាកលវិទ្យាធិការ ​នៃសាកលវិទ្យាល័យភូមិន្ទវិចិត្រសិល្បៈ បាន​មាន​ប្រសាសន៍ថា ​កម្មវិធីនេះ រៀបចំឡើងដើម្បី​រំលឹកដល់​ខួប​នៃការដាក់​បញ្ចូល ​ហើយក៏ជា​ការ​រំលឹក​ដល់ការលៈបង់គ្រប់បែបយ៉ាងរបស់រាជរដ្ឋាភិបាល​ អ្នកជំនាញ ក្នុងការ​ដាក់បញ្ចូល​ប្រាសាទ​ព្រះវិហារ ​ជាសម្បតិ្តបេតិកភណ្ឌពិភពលោក ​និងជាការផ្ញើសារជូន​ដល់ប្រជាពលរដ្ឋ និងយុវជន​ជំនាន់​ក្រោយទាំងអស់ ​ឲ្យមានការចាប់​អារម្មណ៍​ចូលរួម​ចំណែកក្នុងការលើកកម្ពស់ តម្លៃនៃ​សម្បតិ្ត​បេតិកភណ្ឌវប្បធម៌ ​ក្នុងនោះ​មិនមែនមានតែប្រាសាទព្រះវិហារ​មួយនោះទេ ​គឺមានប្រាសាទ​នៅតំបន់អង្គរ ​ប្រាសាទ​តំបន់សំបូរព្រៃគុក ហើយក្រៅពីនោះយើងក៏មាន​សម្បតិ្តបេតិកភណ្ឌ​វប្បធម៌​អរូបី បានចុះក្នុងបញ្ជីបេតិកភណ្ឌវប្បធម៌អរូបី​ នៃមនុស្សជាតិជាច្រើន។

ទន្ទឹមគ្នានោះដែរ ឯកឧត្តម ផេង សំអឿន អគ្គនាយករង នៃអាជ្ញាធរជាតិព្រះវិហារ​ បានលើកឡើងថា ចាប់តាំងពីរមណីយដ្ឋាន​ប្រាសាទព្រះវិហារ ​បានចុះបញ្ជី​ជា​សម្បតិ្ត​បេតិកភណ្ឌ​ពិភពលោក គឺ​អាជ្ញាធរព្រះវិហារ ​តែងតែ​ប្រារព្ធ​នូវខួបអបអរសាទរ ​នៃការដាក់​បញ្ចូល​ប្រាសាទព្រះវិហារ ជា​សម្បតិ្តបេតិកភណ្ឌពិភពលោក ​ក្នុងគោលបំណងសំខាន់ពីរ ​គឺទី១៖ ដើម្បីរំលឹកជាប្រចាំ ដែល​កិច្ចខិតខំប្រឹងប្រែងរបស់រាជរដ្ឋាភិបាល ​និងទី២៖ ចង់​ពញ្ញាក់​ស្មារតី​ឲ្យប្រជាពលរដ្ឋកម្ពុជា ត្រូវតែចងចាំគិតគូរ ​នូវបេតិកភណ្ឌវប្បធម៌ជាតិ។

បើតាមលោក គឹម សំណាង អនុប្រធាននាយកដ្ឋាន​គ្រប់គ្រងដែនដីនគរូបនីយកម្ម និងអភិវឌ្ឍន៍​សហគមន៍ ​នៃអាជ្ញាធរជាតិព្រះវិហារ​ បានឲ្យដឹងថា ​អាជ្ញាធរជាតិព្រះវិហារ បានធ្វើសេចកី្តជូន​ដំណឹង​ពីការប្រកួតប្រជែងនេះជាផ្លូវការ​ មានរយៈពេលប្រមាណជិត៣សប្តាហ៍ ​ចាប់ពីថ្ងៃទី១៣ ដល់ថ្ងៃទី៣០​ ខែមិថុនឆ្នាំ២០២២។ ចំនួនក្រុមនិសិ្សតដែលបានដាក់ស្នាដៃ មានចំនួនសរុប ​៣៨ផ្ទាំង ទាំង​វិចិត្រកម្ម និងGraphic Design ដែលនិសិ្សតទាំងនោះមានមកពី០៣ ​សាកលវិទ្យាល័យ ហើយ​ប្រធានបទ នៃការប្រកួតប្រជែងនេះ ​គឺផ្តោតទៅលើតម្លៃសំខាន់ៗ ​របស់ប្រាសាទព្រះវិហារ ដូចខាង​ក្រោម៖ តម្លៃលេខធ្លោ ​ជាសកលរបស់ប្រាសាទ​ តម្លៃនៃបរិស្ថានធម្មជាតិនៅជុំវិញប្រាសាទ និងតម្លៃមនុស្សជាតិ៕ អត្ថបទ រដ្ឋា