ភ្នំពេញ៖ ប្រជាពលរដ្ឋដែលបានចាក់វ៉ាក់សាំងជាមួយក្រុមគ្រូពេទ្យទាហ៊ានជាច្រើន តាំងពីជាង ១ឆ្នាំមុន គឺមិនទទួលបានកាតគ្រប់គ្នានោះទេ គិតត្រឹមពេលនេះ។

ពាក់ព័ន្ធនឹងចំណុចនេះ ក្រុមការងារនៃក្រសួងការពារជាតិ ក៏បានដាក់ឱ្យប្រើប្រាស់​នូវលេខ​ទូរស័ព្ទចំនួន ៥ខ្សែ និងប្រព័ន្ធតេឡេក្រាម​ ដែលអនុញ្ញាត​ឱ្យប្រជាពលរដ្ឋ ទាក់ទងសួរពីទីតាំង​ទៅ​ទទួលកាតចាក់វ៉ាក់សាំងរបស់ខ្លួន។

ក្រុមការងារនៃក្រសួងការពារជាតិ បានបង្កើតនូវប្រព័ន្ធទូរស័ព្ទចំនួន ៥ខ្សែ ដែលប្រជាពលរដ្ឋ ពុំទាន់​ទទួល​បានកាតចាក់វ៉ាក់សាំង អាចសាកសួរពីទីតាំងទៅទទួលកាតរបស់ខ្លួន។ ​លេខទូរស័ព្ទទាំង ៥ខ្សែនេះ រួមមាន លេខទី១ ០៧០ ៨៥៨ ៧៥០ លេខទី ២គឺ ០១៦ ២៣៨ ៥៨៧ លេខទី៣ គឺ ០៩៧ ៩៨៧ ៧៣៨៣ លេខទី៤គឺ ០១២ ៣៩៤ ០៣៦ និងលេខទី ៥ គឺលេខ ០៧០ ៦១១ ៩៦០។ ចំពោះលេខទូរស័ព្ទទាំង ៥ខ្សែនេះ​ គឺអាចទាក់ទងសាកសួរបាន រៀងរាល់ថ្ងៃម៉ោងធ្វើការ។ ក្រៅពីលេខទូរស័ព្ទទាំង ៥ខ្សែនេះ​ ប្រជាពលរដ្ឋក៏អាចទាក់ទងសួរតាមប្រព័ន្ធ តេឡេក្រាមតាម​រយៈការស្គេន ​QR CODEខាងក្រោមផង។ ​នេះជាការបញ្ជាក់របស់លោក ឧត្តមសេនីយ៍ទោ កុសល សុវណ្ណវិសាល នាយកនៃនាយកដ្ឋានបញ្ជូនសារ ក្រសួងការពារជាតិ។

ពាក់ព័ន្ធនឹងរឿងកាតវ៉ាក់សាំងនេះ សម្រាប់ទីតាំងខណ្ឌដង្កោ ក៏នៅសល់កាតជាច្រើនម៉ឺនកាត ពុំទាន់​មានម្ចាស់មកទទួលយកផងដែរ។ ​ការផ្ដល់កាតវ៉ាក់សាំងនេះ គឺមានមន្រ្តីកងរាជអាវុធហត្ថ និងមន្រ្តី​សាលាខណ្ឌដង្កោ រង់ចាំបម្រើសេវាផ្ដល់កាតជារៀងរាល់ថ្ងៃ ​រៀងរាល់ម៉ោងធ្វើការ។ តាមការបញ្ជាក់របស់កញ្ញា កែវ សម្ផស្ស ​ជាក្រុមការងារផ្ដល់កាតវ៉ាក់សាំងលើកឡើងថា ចំនួន​ប្រជាពលរដ្ឋមកទទួលកាតរាល់ថ្ងៃ គឺមានចំនួនតិចតួចត្រឹមប្រមាណ ១០ទៅ ២០នាក់​ក្នុងមួយថ្ងៃតែប៉ុណ្ណោះ។

កញ្ញាបន្តថា ក្រុមការងារព្យាយាមទាក់ទងតាមលេខទូរស័ព្ទក្នុងកាតនីមួយៗ តែលេខ​ទូរស័ព្ទខ្លះទាក់​ទងពុំចូល​ ឯខ្លះទៀតទាក់ទងចូលហើយ ​តែមិនមកទទួលយកកាត។

សម្រាប់ការផ្ដល់កាតវ៉ាក់សាំងនេះ ក៏អនុញ្ញាតឱ្យមកបើកទទួលយកជំនួសបានដែរ ដោយត្រូវ​ភ្ជាប់​ជាមួយ ចុងសន្លឹក ​និងអត្តសញ្ញាណប័ណ្ណ។ ករណីបាត់ចុងសន្លឹក ​គឺអាចភ្ជាប់ជាមួយ អត្តសញ្ញាណប័ណ្ណ ​ក៏បាន។នេះជាការបញ្ជាក់របស់ ​ក្រុមការងារចែកកាតវ៉ាក់សាំងនៅ ទីតាំង​សាលាខណ្ឌដង្កោ។ ការមកទទួលយកកាតវ៉ាក់សាំងនេះ​ គឺមិនទាមទារឱ្យប្រជាពលរដ្ឋ ត្រូវ​ចំណាយ​ថវិកានោះទេ៕ អត្ថបទ៖ គឹមហុក