ភ្នំពេញ៖ ដោយមានការអនុញ្ញាតជាគោលការណ៍ពីសម្តេចតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា ក្រសួងមុខងារសាធារណៈ កំពុងសិក្សាការផ្លាស់ប្តូរកាតធម្មតារបស់មន្រ្តីរាជការស៊ីវិលទៅជាកាតឌីជីថល ដែលអាចប្រើជាមួយម៉ាស៊ីនATM ពេលបើកប្រាក់បៀវត្ស និងលក្ខណៈពិសេសផ្សេងៗមួយចំនួនទៀត។

ឯកឧត្តម ព្រុំ សុខា រដ្ឋមន្រ្តីក្រសួងមុខងារសាធារណៈ នៅថ្ងៃទី៧ ខែកក្កដានេះ បានអញ្ជើញចូល រួមជាអធិបតីភាពក្នុងពិធីបើកសិក្ខាសិលា ​ស្តីពីរដ្ឋាភិបាលឌីជីថល ដែលការអញ្ជើញចូលពី​តំណាង​ស្ថាន ទូតសិង្ហបុរី និងដៃគូរពាក់ព័ន្ធផ្សេងៗមួយចំនួនទៀតផងដែរ។

ឯកឧត្តម ព្រុំ សុខា មានប្រសាសន៍ថា គោលបំណងក្នុងសិក្ខាសិលានេះ គឺដើម្បីផ្លាស់ប្តូរបទ ពិសោធន៍​រវាងប្រទេសកម្ពុជា និងដៃពាក់ព័ន្ធ ដើម្បីឈានទៅចាប់ការវិវត្តយុគសម័យបដិវត្តន៍​ឧស្សាហកម្ម ៤.០។

ឯកឧត្តម បានបន្តថា ដោយមានអនុញ្ញាតពីសម្តេចតេជោ ហ៊ុន សែន នាយករដ្ឋមន្រ្តី ក្រសួង​មុខងារសាធារណៈ កំពុងសិក្សាការផ្លាស់ប្តូរកាតធម្មតា​ របស់មន្រ្តីរាជការស៊ីវិល​ទៅជាកាតឌីជីថល ដែលអាចប្រើជាមួយម៉ាស៊ីនATM ​ពេល​បើកប្រាក់​បៀវត្សរ៍ ​និង​លក្ខណៈពិសេសផ្សេងៗមួយ ចំនួនទៀត។

តាមការចង្អុលបង្ហាញ ក្នុងក្របខណ្ឌគោលនយោបាយសេដ្ឋកិច្ច និងសង្គមឌីជីថលកម្ពុជា ២០២១-២០៣៥ ការកសាងរដ្ឋាភិបាលឌីជីថល​ ជាសសរស្តម្ភចាំបាច់ និងត្រូវបោះជំហានមុន ដើម្បីជំរុញ ល្បឿនក្នុងការកសាងពលរដ្ឋ ​និងធុរកិច្ចឌីជីថល និងធានាភាព​ជោគជ័យ​ខ្ពស់ក្នុងការអភិវឌ្ឍ​សេដ្ឋកិច្ច និងសង្គមឌីជីថលទាំងមូល។

រដ្ឋាភិបាលឌីជីថល គឺជាការរៀបចំប្រព័ន្ធអភិបាលកិច្ច ការកែលម្អ ​និងការលើកកម្ពស់ប្រសិទ្ធភាព ក្នុងការបម្រើសេវាសាធារណៈ ​តាមរយៈការធ្វើបរិវត្តកម្មឌីជីថលរបស់ក្រសួងស្ថាប័ន លើការ​គ្រប់គ្រង និងរចនាសម្ព័ន្ធ ​ដែលនាំឱ្យប្រជាពលរដ្ឋ និងធុរកិច្ច ចាប់យក និងប្រើប្រាស់បច្ចេក​វិទ្យាឌីជីថល​ ដើម្បីបង្កើនប្រសិទ្ធភាព ប្រសិទ្ធផល ​តម្លាភាព ការបើកចំហ ក៏ដូច​ជា​ជំរុញ​សន្ទុះ​នៃ​ការអភិវឌ្ឍសេដ្ឋកិច្ចនិងសង្គម៕អត្ថបទ៖ ទូច សោភ័ណ