អង់គ្លេស៖ ការបាត់បង់អំណាចរបស់លោកនាយករដ្ឋមន្ត្រីអង់គ្លេស Boris Johnson ត្រូវបានផ្ដល់ភាពរីករាយ និងការចំអកនៅក្នុងទីក្រុង Moscow ខណៈដែលនៅក្នុងទីក្រុង Kyiv លោកប្រធានាធិបតី Volodymyr Zelenskiy បានបង្ហាញការមិនសប្បាយចិត្តចំពោះការលាលែងពីតំណែង របស់សម្ព័ន្ធមិត្តដ៏សំខាន់របស់លោក។
លោក Johnson ដែលបានផ្ដល់អាវុធដ៏សំខាន់ទៅឲ្យអ៊ុយក្រែន ក្នុងដំណាក់កាលដំបូងនៃសង្គ្រាម និងជាមេដឹកនាំដំបូងនៃក្រុមប្រទេសដែលមានឧស្សាហកម្មលូតលាស់ទាំង៧ ឬ G7 ដែលបានធ្វើដំណើរទៅកាន់រដ្ឋធានី Kyiv កាលពីខែមេសា បានបង្ហាញខ្លួនជាមេដឹកនាំដែលមានការគោរពស្រឡាញ់ច្រើន នៅក្នុងប្រទេសអ៊ុយក្រែន។ លោក Zelenskiy បាននិយាយនៅក្នុងសេចក្ដីថ្លែងការណ៍មួយ បន្ទាប់ពីមេដឹកនាំទាំង២ បានសន្ទនាតាមទូរស័ព្ទថា យើងទាំងអស់គ្នាបានលឺដំណឹងដ៏សោកស្ដាយពីការលាលែងតំណែងរបស់លោក Johnson។ មិនត្រឹមតែខ្ញុំប៉ុណ្ណោះទេ ថែមទាំងសង្គមអ៊ុយក្រែនទាំងមូល ដែលបានបង្ហាញការអាណិតអាសូរចំពោះរូបលោក។
ចំណែកនៅក្នុងប្រទេសរុស្ស៊ីវិញការគាំទ្ររបស់លោក Johnson ចំពោះអ៊ុយក្រែនបានធ្វើឲ្យលោកក្លាយជាគោលដៅភាគច្រើន សម្រាប់ប្រព័ន្ធផ្សព្វផ្សាយ។ វិមានក្រឹមឡាំងបានហៅលោកថា ជាមេដឹកនាំប្រឆាំងរុស្ស៊ីដ៏សកម្មបំផុត។ អ្នកនាំពាក្យរបស់លោក Vladimir Putin លោក Dmitry Peskov បាននិយាយកាលពីព្រឹកថ្ងៃព្រហស្បតិ៍ថា លោក Johnson មិនចូលចិត្តយើង យើងក៏មិនចូលចិត្តលោកវិញដូចគ្នា៕
អត្ថបទ៖ សុខមាន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
