បេឡារុស៖ លោកប្រធានាធិបតីបេឡារុស Alexander Lukashenko ដែលជាសម្ព័ន្ធមិត្តជិតស្និទ្ធរបស់លោកប្រធានាធិបតីរុស្ស៊ី Vladimir Putin បានព្រមានកាលពីថ្ងៃអង្គារថា គោលនយោបាយរបស់លោកខាងលិចកំពុងរុញដោលពិភពលោក ឲ្យខិតកាន់តែកៀកមាត់ជ្រោះនៃសង្គ្រាមដ៏ធំដែលនឹងពុំមានអ្នកឈ្នះអ្នកចាញ់។
ទីភ្នាក់ងារសារព័ត៌មានរដ្ឋបេឡារុស BelTA បានរាយការណ៍ថា លោក Lukashenko បានធ្វើអត្ថាធិប្បាយបែបនេះ អំឡុងពិធីប្រគល់សញ្ញាប័ត្រកិត្តិយកនៅសាលាយោធា និងក្រុមមន្ត្រីជាន់ខ្ពស់។ អំឡុងការអត្ថាធិប្បាយរបស់ខ្លួនលោក Lukashenko ក៏បានអះអាងផងដែរថា សហរដ្ឋអាមេរិកស្ថិតនៅពីក្រោយការជំរុញដល់សមាជិកសម្ព័ន្ធយោធាណាតូ បង្កការប៉ះពាល់ដល់អំណាច និងសន្តិសុខរបស់ប្រទេសបេឡារុស និងរុស្ស៊ី។
យោងតាមការបកប្រែពីទីភ្នាក់ងារសារព័ត៌មានរដ្ឋ Tass របស់រុស្ស៊ី លោក Lukashenko បានថ្លែងក្នុងអំឡុងសុន្ទរកថាកាលពីថ្ងៃអង្គារថា បណ្ដាប្រទេសលោកខាងលិចដែលត្រូវបានដឹកនាំ រៀបចំដោយបើកចំហដោយសហរដ្ឋអាមេរិក កំពុងរំលាយប្រព័ន្ធសន្តិសុខសកលបន្ដិចម្ដងៗ និងមិនគិតសូម្បីតែផលប្រយោជន៍ប្រទេសជាតិខ្លួនឯង និងបំណងរបស់ប្រជាជនរបស់ពួកគេ។ ទីភ្នាក់ងារសារព័ត៌មាន BelTA បានរាយការណ៍ថា លោក Lukashenko បាននិយាយថា លោកខាងលិចកំពុងបង្កើតផែនការថ្មីៗដើម្បីវាយប្រហារប្រទេសរុស្ស៊ី៕
អត្ថបទ៖ សុខមាន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
