​ហៃទី៖ កម្មវិធី​ស្បៀងអាហារ​ពិភពលោក​របស់​អង្គការសហប្រជាជាតិ (WFP) បាន​ព្រមាន​ថា ភាពអត់ឃ្លាន​នៅក្នុង​ប្រទេស​ហៃ​ទី​នឹង​កើនឡើងក្នុងពេលដែល​អតិផរណា​កើនឡើង ការចំណាយ​ខ្ពស់​លើ​ស្បៀងអាហារ និង​ប្រេងឥន្ធនៈ និង​ការកើនឡើង​អំពើហិង្សា​។

​លោក Jean-Martin Bauer នាយក​កម្មវិធី​ស្បៀងអាហារ​ពិភពលោក​ប្រចាំ​ប្រទេស​ហៃ​ទីបាន​និយាយថា មនុស្សប្រមាណ ​1.3លាន​នាក់​កំពុង​ប្រឈម​គ្រោះអាសន្ន​អសន្តិសុខ​ស្បៀង​។ ​ប្រជាជន 1.3លាន​នាក់​នៅក្នុង​ប្រទេស​ហៃ​ទី យើង​បាន​ចាត់ទុកថា ​ជា​ដំណាក់កាល​ប្រឈម​អសន្តិសុខ​ស្បៀង​ក្នុង​ភាពអាសន្ន ហើយ​ដំណាក់កាល​ចុងក្រោយ​នឹង​ជា​ដំណាក់កាល​ធ្ងន់ធ្ងរ​បំផុត​នៃ​សន្តិសុខ​ស្បៀង​ ជា​អ្វីដែល​យើង​ហៅថា​ទុរ្ភិក្ស​។ ​ស្ថានភាព​កាន់តែ​ធ្ងន់ធ្ងរ​ឡើង​បណ្តា​ល​មកពី​ជំងឺ​រាតត្បាត ​COVID-19 គ្រោះមហន្តរាយធម្មជាតិ ការឡើង​ថ្លៃ​អាហារ និង​ថាមពល​ដែល​បាន​កើនឡើង​ក្នុង​ប៉ុន្មាន​សប្តាហ៍​ថ្មីៗ​នេះ ​បន្ទាប់ពី​សង្គ្រាម​របស់​រុស្ស៊ី​នៅ​អ៊ុយ​ក្រែ​ន និង​អំពើហិង្សា​របស់​ក្រុម​ជន​អន្ធពាល​នៅ​ហៃ​ទី​។

​កាលពី​ខែ​មុន បេសកជន​ពិសេស​របស់​អង្គការសហប្រជាជាតិ​បាន​ព្រមាន​ថា នគរបាលជាតិ​​ហៃ​ទី​ត្រូវការ​ជំនួយ​បន្ទាន់ដើម្បី​ប្រយុទ្ធប្រឆាំង​ឧក្រិដ្ឋកម្ម និង​អំពើ​ហិ​ង្សា ព្រោះ​អសន្តិសុខ​កាន់តែខ្លាំង​ឡើង​ឆាប់រហ័ស​។​ ​ការកាន់កាប់របស់​ក្រុម​ជន​អន្ធពាល​លើទឹក​ដី​នេះ បាន​កើនឡើង​ចាប់តាំងពី​ការធ្វើឃាត​ប្រធានាធិបតីលោក Jovenel Moïse កាល​ពីមួយ​ឆ្នាំមុន ខណៈ​លោក​ត្រូវបាន​គេ​បាញ់សម្លាប់​នៅ​លំនៅឋាន​កាលពី​ថ្ងៃទី7 ខែកក្កដា ហើយ​ពួកគេ​គ្រប់គ្រង​ផ្លូវធំៗដែល​ឆ្ពោះទៅ​ភាគ​ខាងជើង និង​ខាងត្បូង​ពី​រដ្ឋធានី៕

អត្ថបទ៖ ប៊ុនថន