ដើម្បីទទួលបានព័ត៌មានថ្មីៗ រហ័ស សូមចុច Join Channel Telegram BTV News 

កំពង់ឆ្នាំង៖ នៅព្រឹកថ្ងៃទី១៤ ខែកក្កដា ឆ្នាំ២០២២នេះ កងរាជអាវុធហត្ថលើផ្ទៃប្រទេស បាន​រៀបចំ​ពិធីរំលឹកខួបលើកទី២៩ឆ្នាំ នៃការបង្កើតស្ថាប័នរបស់ខ្លួននៅក្នុងទឹកដីខេត្តកំពង់ឆ្នាំង ក្រោម​អធិបតីភាពឯកឧត្តម នាយឧត្តមដសនីយ៍ វង្ស ពិសេន អគ្គមេបញ្ជាការ​កង​យោធពល​ខេមភូមិន្ទ តំណាងដ៏ខ្ពង់ខ្ពស់សម្តេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រី​ក្រសួង​ការពារជាតិ, ឯកឧត្តមនាយឧត្តមសេនីយ៍ សៅ សុខា អគ្គមេ​បញ្ជាការរង នៃ​កង​យោធពល​ខេមរភូមិន្ទ និងជាមេបញ្ជាការកងរាជអាវុធហត្ថលើផ្ទៃប្រទេស។ ពិធីនេះក៏មានការចូលរួមពីឯកឧត្តម នាយឧត្តមសេនីយ៍ ឧត្តមសេនីយ៍ ដោកជំទាវ អ្នកឧកញ៉ា លោកឧកញ៉ា លោក លោកស្រីតំណាងក្រសួង ស្ថាប័ន នាយទាហាន នាយនគរបាល នាយ​អាវុធហត្ថ អស់លោក លោកស្រី អនុព័ន​យោធាបណ្តាប្រទេសជាមិត្ត ប្រចាំព្រះរាជាណាចក្រ​កម្ពុជា​ផងដែរ។

នៅក្នុងពិធីរំលឹកខួប២៩ឆ្នាំ នៃការបង្កើតកងរាជអាវុធហត្ថលើផ្ទៃប្រទេសនេះផងដែរ កងរាជ​អាវុធហត្ថ​ខេត្តកំពង់ឆ្នាំង ក៏បានសម្ពោធ​ដាក់​អោយ​ប្រើប្រាស់​អគារ​សេនាធិការដ្ឋាន​ថ្មី​មួយ​របស់​ខ្លួន ដើម្បីជាការអបអរដល់ថ្ងៃបង្កើតកងរាជអាវុធហត្ថ ១៤ កក្កដា ១៩៩៣ - ១៤កក្កដា ២០២២ ផងដែរ។ អគារសេនាធិការដ្ឋាន កងរាជអាវុធហត្ថខេត្តកំពង់ឆ្នាំង ដែលចាប់ផ្តើម​បញ្ចុះ​បឋម​សិលាកសាងនេះ គឺជាសំណង់ជំហានដំបូងនៅលើផ្ទៃដី ៣០.៧០០ម៉ែត្រការ៉េ ទំហំអគារ​ទទឹង​ប្រវែង១១ម៉ែត្រ បណ្តោយប្រវែង៥៦ម៉ែត្រ កម្ពស់៣ជាន់ប្រើប្រាស់ថវិកា ចំនួន ៦២០.០០០​ដុល្លារអាមេរិក និងត្រូវប្រើរយៈពេលសាងសង់ប្រមាណ៣៦ខែ។ ថវិកា​សម្រាប់​ការ​សាងសង់​នេះ មេបញ្ជាការកងរាជអាវុធហត្ថលើផ្ទៃប្រទេស គឺចូលរួមចំនួន១០ម៉ឺនដុល្លារ ដើម្បីចាប់ផ្តើមការដ្ឋាន ក្រៅពីនេះ និងបន្តចលនាសប្បុរសជន។

កងរាជអាវុធហត្ថ គឺជាអង្គភាពទ័ពជំនាញមួយ ជាផ្នែកមួយនៃកងយោធពលខេមរភូមិន្ទ។ កងរាជអាវុធហត្ថមានតួនាទី និងភារកិច្ចថែរក្សាការពារសន្តិសុខ សណ្តាប់ធ្នាប់ ជួយ​សង្គ្រោះ​ប្រជាពលរដ្ឋ ស្រាវជ្រាវ និងបង្ក្រាបបទល្មើសព្រហ្មទណ្ឌទូទៅ ការពារកិត្តិយស និង​ផល​ប្រយោជន៍​យោធា និងផ្តល់កម្លាំងគាំទ្រ ក្រសួង ស្ថាប័ន ដើម្បីពង្រឹងការអនុវត្តន៍ច្បាប់ ។ មានវិសាលភាពលើផ្ទៃប្រទេសទាំងមូលទៅលើយោធាក្នុងជួរកងទ័ព និងលើពលរដ្ឋស៊ីវិល​ថែម​ទៀត​ផង​នេះ៕ អត្ថបទ៖ ហុង វាស្នា