ភ្នំពេញ៖ ក្រសួងការងារ និងបណ្តុះបណ្តាល វិជ្ជាជីវៈ នៅព្រឹកទី១៥ ខែកក្កដា ឆ្នាំ២០២២នេះ បាន​បន្ត​បើក​កិច្ច​ប្រជុំ​ផ្សព្វ​ផ្សាយ​ការ​ដាក់​ឱ្យ​អនុវត្ត​របប​សន្តិសុខ​សង្គម​ផ្នែក​ប្រាក់​សោធន សម្រាប់​បុគ្គល​ទាំងឡាយ​ដែល​ស្ថិត​នៅ​ក្រោម​បទប្បញ្ញត្តិ នៃ​ច្បាប់​ស្តីពី​ការងារ ​ទៅ​ដល់​តំណាងភាគី​និយោជក និង​ក៏​ជាកិ​ច្ច​ប្រជុំ​លើក​ទី​៤​នៃ​យុទ្ធនាការ ៩០ថ្ងៃ ដើម្បី​ធ្វើ​ការ​ផ្សព្វ​ផ្សាយ​ពី​គោល​នយោបាយ​របស់​រាជ​រដ្ឋាភិបាល ក៏ដូចជា​អត្ថ​ប្រយោជន៍ និងកាតព្វកិច្ច ដែលបងប្អូនកម្មករនិយោជិត និងនិយោជក ត្រូវ​មាន​កាតព្វកិច្ច និង​ទទួល​បាន​ពី​ការអ​នុវត្ត​របប​សន្តិសុខសង្គ​ម​ផ្នែក​ប្រាក់សោធន​នេះ។

កិច្ចប្រជុំនេះបានរៀបចំឡើង​នៅ​សណ្ឋាគារ​រាជធានីភ្នំពេញ​ក្រោម​អធិបតី​ភាព​របស់​ឯឧត្តម​បណ្ឌិត អ៊ិត​ សំហេង រដ្ឋមន្ត្រី​ក្រសួងការងារ និងបណ្តុះបណ្តាលវិជ្ជាជីវៈ និង​ជាប្រធាន​ក្រុម​ប្រឹក្សាភិបាល នៃ​បេឡាជាតិ​សន្តិសុខសង្គម។

សូមបញ្ជាក់ថា ការបង្កើតឱ្យមានរបបសន្ដិសុខសង្គមផ្នែកប្រាក់សោធននេះឡើង គឺជាការយក​ចិត្ត​ទុក​ដាក់​ខ្ពស់​បំផុត​របស់​រាជ​រដ្ឋាភិបាលកម្ពុជា ក្រោមការដឹកនាំប្រកបដោយគតិបណ្ឌិត និង​ឈ្លាស​វៃ​បំផុត ពីសំណាក់សម្ដេចតេជោ ហ៊ុន សែន នាយករដ្ឋមន្រ្តី នៃកម្ពុជា ទៅលើ​ជីវភាព​រស់​នៅ ​ក្នុង​ន័យកាត់បន្ថយភាពក្រីក្រ និងធានានូវសុខុមាលភាពរបស់បងប្អូនប្រជាពលរដ្ឋ ពិសេ​ស​បង​ប្អូន​កម្មករ​និយោជិត​។