ភ្នំពេញ៖ អង្គការ ILO​ សន្យាជួយក្រសួងទេសចរណ៍លើការបណ្តុះបណ្តាលធនធានមនុស្ស លើជំនាញម្ហូបចិន ក្នុងខេត្តគោលដៅចំនួន ៣ ដែលជាផ្នែកមួយនៃការស្តារជំនាញវិជ្ជាជីវៈឡើងវិញ ក្នុងនិងក្រោយវិបត្តិកូវីដនេះ។

ឯកឧត្តម ប៉ាក់ សុខុម រដ្ឋលេខាធិការក្រសួងទេសចរណ៍ បានទទួលជួបលោក Yutong Liu នាយក​គម្រោង និងជាអ្នកសម្របសម្រួលគម្រោងភាពជាដៃគូ អង្គការអន្តរជាតិផ្នែកការងារ ILOប្រទេស​ចិន ពិភាក្សាលើការ ពង្រីកការផ្តល់ជំនួយកសាងធនធានមនុស្ស ស្តារជំនាញ​វិជ្ជាជីវៈ​ឡើងវិញ ក្នុងនិងក្រោយវិបត្តិកូវីដនេះ ហើយILOនឹងពង្រីកការបណ្តុះបណ្តាលជំនាញ​ធ្វើម្ហូបបែបចិន​ដល់​ចុងភៅវ័យក្មេងកម្ពុជា។

លោក ជួប រតនា ប្រធាននាយកដ្ឋានផែនការអភិវឌ្ឍន៍ទេសចរណ៍ និងជាប្រធានលេខាធិការដ្ឋាន​នៃគណៈកម្មការ គ្រប់គ្រងគម្រោង ​ហូកាបានថ្លែងក្រោយជំនួបនោះថា ​នៅក្នុងជំនួបនេះ លោក Yutong Liu នាយកគម្រោង ILO –China ​នឹងបន្តគាំទ្រដល់ក្រសួងទេសចរណ៍ តាមរយៈគណៈកម្មការ​គ្រប់គ្រងគម្រោង ហូកា ដើម្បីជំរុញការ ​បណ្តុះបណ្តាលជំនាញទេសចរណ៍បន្ថែមលើខេត្តសៀមរាប រួមមានខេត្តបាត់ដំបង និងបន្ទាយមានជ័យ ហើយនឹងពិនិត្យលទ្ធភាពដើម្បីជំរុញកិច្ច​សហប្រតិបត្តិការ​លើការភ្ជាប់ទំនាក់ទំនងរវាងសាលាបណ្តុះបណ្តាល​ជំនាញវិជ្ជាជីវៈទេសចរណ៍​នៅកម្ពុជា ជាមួយសាលាបណ្តុះបណ្តាលបណ្តាលវិជ្ជាជីវៈទេសចរណ៍​នៅប្រទេសចិនផងដែរ។

ឯកឧត្តម ប៉ាក់ សុខុម រដ្ឋលេខាធិការក្រសួងទេសចរណ៍ បានថ្លែងថា បច្ចុប្បន្នអង្គការអន្តរជាតិ​ខាងការងារ (ILO) ​បានគាំទ្រផ្តល់ការបណ្តុះបណ្តាលបុគ្គលិក​ជំនាញ​ទេសចរណ៍ជាច្រើន ហើយ​កន្លងមកអង្គការ ILO បានគាំទ្រការ បណ្តុះបណ្តាលគ្រូបង្គោលបានចំនួន ២៤រូប និងអ្នកជំនាញ​ចំនួន ៣១រូបលើជំនាញសេ វាកម្មម្ហូបអាហារ និងភេសជ្ជៈ និងការបណ្តុះបណ្តាលបន្តខាងក្នុង​មូលដ្ឋាន​អាជីវកម្មទេសចរណ៍ ដល់អ្នកជំនាញច្រើនជាង ២០០រូប។

ឯកឧត្តម បន្តទៀតថា ​បន្ថែមលើនេះការគាំទ្ររបស់អង្គការអន្តរជាតិខាងការងារ (ILO) នឹង​ផ្តល់ការបណ្តុះបណ្តាល​ គ្រូបង្គោលចំនួន ១២៥រូប ​និងអ្នកជំនាញចំនួន ១៥០រូប លើជំនាញ​សេវាកម្មម្ហូបអាហារនិងភេជ្ជៈ ការិយាល័យ ជួរមុខ ​និងគេហកិច្ច ដែលការបណ្តុះបណ្តាលនេះនឹង​គាំទ្រដល់​យុទ្ធសាស្ត្ររបស់ក្រសួងទេសចរណ៍ក្នុងការ ពង្រឹង ការអភិវឌ្ឍ​ជំនាញវិជ្ជាជីវៈទេសចរណ៍​ក្នុងបរិបទថ្មី៕ អត្ថបទ ស៊ុម សុខជា