ភ្នំពេញ៖ លោកវេជ្ជបណ្ឌិត ងី មានហេង ប្រធានមនី្ទរសុខាភិបាលរាជធានីភ្នំពេញ ប្រាប់BTV ព័ត៌មាននាព្រឹកថ្ងៃទី១៦ ខែកក្កដា ឆ្នាំ២០២២នេះ ក្នុងមូលដ្ឋានរាជធានីភ្នំពេញ ករណី​ជំងឺ​គ្រុន​ឈាម មិនទាន់មានការរាតត្បាតធំនោះទេ បើធៀបនឹងចំនួនមធ្យមរយៈពេល៥ឆ្នាំចុងក្រោយ គឺមានចំនួនករណីទាបជាង។

លោកវេជ្ជបណ្ឌិត បន្តថា ការលុបបំបាត់ជម្រកមូសខ្លា គឺមានប្រសិទ្ធភាពជានិរន្តរ ទាំងអស់​នេះ​ជា​រឿងដែលមេគ្រួសារត្រូវតែអនុវត្តន៍។ ជាក់ស្តែង​ករណី​ជំងឺ​គ្រុន​ឈាម​រយៈពេល ៥ឆ្នាំ​ចុង​ក្រោយ ចាប់ពីឆ្នាំ២០១៧-២០២១ ក្នុងនោះករណីជំងឺគ្រុនឈាមឆ្នាំ២០១៧ មានចំនួន​សរុប ១៨៨២​ករណី, ឆ្នាំ២០១៨ មានចំនួនសរុប៩៤២៤ករណី, ឆ្នាំ២០១៩ មាន​ចំនួន​សរុប​៩២៥៨​ករណី, ឆ្នាំ២០២០ មានចំនួនសរុប២៥៦៥ករណី និងឆ្នាំ២០២១ មានចំនួនសរុប៦៨៥ករណី។ ដោយ​ឡែកបច្ចុប្បន្នភាពជំងឺគ្រុនឈាម ក្នុងការឆ្លើយតបនឹងការរាតត្បាតករណីជំងឺគ្រុនឈាម ក្នុង​រយៈពេល៦ខែ ដើមឆ្នាំ២០២២នេះ ក្នុងមូលដ្ឋានរាជធានីភ្នំពេញ មានចំនួន៣៧៥ករណី។

លោកវេជ្ជបណ្ឌិត ងី មានហេង បានសង្កត់ធ្ងន់ថា ករណីជំងឺគ្រុនឈាម គឺ​កើត​លើ​មនុស្ស​គ្រប់​វ័យ ប្រជាពលរដ្ឋដែលមានការសង្ស័យថាកើតជំងឺគ្រុនឈាមដំបូង សូម​អំពាវ​នាវ​ដល់​បងប្អូន​ប្រជាពលរដ្ឋ​ទាំងអស់អញ្ជើញទៅរកសេវាសុខាភិបាលរបស់មនី្ទរពេទ្យរដ្ឋ ព្រោះថាក្នុង​មូលដ្ឋាន​រាជ​ធានី​ភ្នំពេញ យើងមានមណ្ឌលសុខភាព ចំនួន៤៣មណ្ឌលសុខភាព មនី្ទរពេទ្យបង្អែក ចំនួន០៨ និង​មនី្ទរ​រដ្ឋថ្នាក់ជាតិ សម្រាប់ពិនិត្យ ព្យាបាលជូនបងប្អូនប្រជាពលរដ្ឋ។ ជាមួយគ្នានោះ មន្ត្រី​នៃ​មនី្ទរ​សុខាភិបាលរាជធានីភ្នំពេញ ខិតខំបំពេញភារកិច្ចរបស់ខ្លួន ចុះអន្តរាគមន៍ ធ្វើរោគវិនិច្ឆ័យ និង​ព្យាបាល​បាន​ទាន់ពេលវេលា ដាក់ថ្នាំអាបែត តាមផ្ទះ និងបាញ់​ថ្នាំ​មូស​តាម​សហគមន៍​ងាយ​រង​គ្រោះ ព្រមទាំងចុះអប់រំមាតា បិតា អាណាព្យាបាល របស់កុមារឲ្យទទួលខុសត្រូវ ចូលរួម​លុប​បំបាត់​ជម្រក​មូសខ្លា ខាំកូនៗ និងនាំកូនទៅមនី្ទរពេទ្យឲ្យទាន់ពេលវេលានៅពេលក្តៅខ្លួន និង​ចេះ​ថែ​ទាំអ្នកជំងឺគ្រុនឈាមផងដែរ៕ អត្ថបទ៖ រដ្ឋា