កណ្ដាល៖ ពលរដ្ឋក្រុងតាខ្មៅនៅខេត្តកណ្តាល ដែលមានលំហូរចេញចូលរាជធានីភ្នំពេញច្រើន​ជាងគេ បានចាក់វ៉ាក់សាំងការពារកូវីដ១៩ ដូសជម្រុញ ​មានសន្ទស្សន៍កើនលឿនជាង​បណ្តា​ស្រុក​នានា​របស់​ខេត្តកណ្តាល ហើយការអនុវត្តវិធានសុខាភិបាល​ដើម្បីការពារការឆ្លង​មេរោគ​កូវីដ១៩ ​ក៏ស្ថិតក្នុងស្ថានភាពល្អប្រសើរ ខណៈបច្ចុប្បន្ន ក្រសួងសុខាភិបាល​បានប្រកាសករណី​កើតឆ្លង​មេរោគកូវីដ១៩ ជាពិសេសការឆ្លងកើតជំងឺអូមីក្រុងជាបន្តបន្ទាប់។

ពលរដ្ឋដែលបាននាំគ្នាទៅចាក់វ៉ាក់សាំងនៅមន្ទីរពេទ្យជ័យជំនះក្រុងតាខ្មៅ បានថ្លែងប្រាប់BTV នៅថ្ងៃទី១៨ខែកក្ដដានេះ ថា ខណៈដែលក្រសួងសុខាភិបាលប្រកាសករណីឆ្លងកើតថ្មី​នៃមេរោគ​កូវីដអូមីក្រុង​រៀងរាល់ថ្ងៃនេះ ​បានជម្រុញពួកគាត់នាំគ្នាចាក់វ៉ាក់សំាងដូសជម្រុញ ​និងពង្រឹងការ​អនុវត្តវិធាន​ការអនាម័យ៣កុំ៣ការពារចៀសផុតពីមេរោគកូវីដអូមីក្រុងទាំងនេះ ដើម្បីកុំឲ្យឆ្លងកើត​ជំងឺ​កូវីដធ្ងន់ធ្ងរដែលធ្វើឲ្យប៉ះពាល់​ដល់ការងារប្រកបរកស៊ីប្រចាំនៅក្នុងក្រុមគ្រួសារផង និងឆ្លងទៅអ្នកដទៃផង។

វេជ្ជបណ្ឌិត គួយ ប៊ុនធឿន ប្រធានមន្ទីរសុខាភិបាលខេត្តកណ្តាល ថ្លែងថា នៅពេលបច្ចុប្បន្នសំគាល់​ឃើញថា ​ពលរដ្ឋអញ្ជើញទៅចាក់វ៉ាក់សាំងនៅក្នុងក្រុងតាខ្មៅហាក់មាន​សន្ទស្សន៍ច្រើន​ជាង​បណ្តាស្រុកនានា​របស់ខេត្តកណ្តាល។

វេជ្ជបណ្ឌិត លី មករា ប្រធានមន្ទីរពេទ្យជ័យជំនះ ក្រុងតាខ្មៅ ថ្លែងថា ជារួមបន្ទាប់ពីប្រមុខថ្នាក់ដឹកនាំ​រាជរដ្ឋាភិបាលបានប្រកាសកាសរកឃើញករណីឆ្លងកើតជំងឺកូវីដមក ក្នុងរយៈពេលប្រមាណ​ជាង​២សប្តាហ៍កន្លងមកនេះ ​សំគាល់ឃើញថា ​នៅក្នុងមន្ទីរពេទ្យជ័យជំនះ ពលរដ្ឋមកចាក់វ៉ាក់សាំង​ដូស​ជម្រុញមានចំនួនច្រើនរៀងរាល់ថ្ងៃ ​ជាពិសេសថ្ងៃឈប់សម្រាកចុងសប្តាហ៍។

តាមរបាយការណ៍មន្ទីរសុខាភិបាលខេត្តកណ្តាល នៅទូទាំងខេត្តកណ្តាល មានពលរដ្ឋត្រូវចាក់វ៉ាក់​សាំង​កូវីដមាន​ប្រមាណជាង ១លាន៤ម៉ឺននាក់ ក្នុងនោះមានពលរដ្ឋវ័យចាប់ពី​៣ឆ្នាំដល់​វ័យចាស់​បានចាក់ចំនួន​២ដូសរួច ​មានប្រមាណ១០៧.៤៣% ចាក់ដូសទី៣ ​មានប្រមាណជិត៩០% ដោយឡែក​មនុស្សវ័យចាប់ពី៥ឆ្នាំដល់វ័យចាស់ បានចាក់ដូសទី៤មានប្រមាណ២៣% ហើយការការ​ចាក់ដូសទី៥ ដែលមាន​វ័យ​ចាប់ពី ១២ឆ្នាំឡើងដល់វ័យចាស់គឺមានប្រមាណ១.៤៦%៕

អត្ថបទ ស៊ុម សុខជា