ភ្នំពេញ៖ ឯកឧត្តម វេជ្ជបណ្ឌិត ងី មានហេង ប្រធានមនី្ទរសុខាភិបាលរាជធានីភ្នំពេញ ប្រាប់BTV ព័ត៌មាន តាមរយៈប្រព័ន្ធតេឡេក្រាម (Telegram) នាព្រឹកថ្ងៃទី១៩ ខែកក្កដា ឆ្នាំ២០២២នេះថា ដោយគិតត្រឹមថ្ងៃ១៨ ខែកក្កដាម្សិលមិញនេះ នៅរាជធានីភ្នំពេញ មានអ្នកឆ្លងជំងឺកូវីដ-១៩ ចំនួន១៤១ករណី បន្ទាប់ពីកម្ពុជាគ្មានករណីឆ្លងរយៈពេល ៥២ថ្ងៃមកហើយនោះ។

ឯកឧត្តមវេជ្ជបណ្ឌិត ងី មានហេង បញ្ជាក់ទៀតថា កម្ពុជា ចាប់ផ្តើមមានករណីឆ្លងថ្មីឡើងវិញ ចាប់​ពីថ្ងៃទី២៨ ខែមិថុនា រហូតមកដល់ថ្ងៃទី១៩ ខែកក្កដា ឆ្នាំ២០២២​ ក្នុងរាជធានីភ្នំពេញ មានអ្នក​ជំងឺ​កូវីដ-១៩ ១៤១ករណី (ករណីជំងឺកូវីដ១៩ វិជ្ជមានថ្មី ពិនិត្យដោយម៉ាស៊ីន PCR សំរាប់ថ្ងៃទី១៨ ខែកក្កដា ឆ្នាំ២០២២ ករណីឆ្លងក្នុងសហគមន៍ មានចំនួន១៨ករណីនៅរាជធានីភ្នំពេញ សុំ​វិញ្ញាបនបត្រ​ និងសុំសម្រាកព្យាបាលតាមផ្ទះរៀងខ្លួន) គ្មានករណីស្លាប់ និងគ្មានរោគសញ្ញាធ្ងន់ធ្ងរ គឺសុទ្ធតែព្យាបាលនៅតាមផ្ទះរៀងៗខ្លួន គ្មានអ្នកជំងឺកូវីដ-១៩ មកសម្រាកព្យាបាលនៅ​តាម​មនី្ទរពេទ្យនោះទេ។ បើទោះបីជាជំងឺកូវីដ-១៩ មានការឆ្លងឡើងវិញ ​និងមានចំនួនតិចតួចក៏ដោយ ប៉ុន្តែគ្រប់មនី្ទរពេទ្យទាំងអស់ក្នុងមូលដ្ឋានរាជធានីភ្នំពេញ បានត្រៀមរួចជាស្រេច ដើម្បីទប់ស្កាត់ការ​រីករាលដាលជំងឺដ៏កាចសាហាវនេះ។

ឯកឧត្តម បានអះអាងទៀតថា ទីតាំងព្យាបាលកូវីដ-១៩ គឺនៅតាមមនី្ទរពេទ្យរដ្ឋទាំងអស់ គឺ៨មនី្ទរពេទ្យបង្អែក និងមនី្ទរពេទ្យជាតិ ចំនួន៧-៨ សរុបទាំងអស់១៥មនី្ទរពេទ្យ។

ជាចុងក្រោយឯកឧត្តមវេជ្ជបណ្ឌិត ងី មានហេង បានបន្ថែមទៀតថា អ្នកជំងឺកូវីដ-១៩ ចង់​សម្រាកព្យាបាលនៅតាមមនី្ទរពេទ្យឯកជន ​លុះត្រាតែមនី្ទរពេទ្យឯកជនទាំងនោះ មានការ​អនុញ្ញាត​ពីក្រសួងសុខាភិបាល ​ទើបអាចទៅទទួលព្យាបាលជំងឺកូវីដ-១៩បាន និងសូមធ្វើការអំពាវនាវ​ដល់ប្រជាពលរដ្ឋទាំងអស់ ​បន្តរក្សាការប្រុងប្រយ័ត្ន ​និងបន្តចូលរួមចាក់វ៉ាក់សាំងបង្ការជំងឺកូវីដ-១៩ ដូស​មូលដ្ឋាន និងដូសជំរុញ ទី៣ ទី៤ និងទី៥ ឲ្យបានគ្រប់ចំនួនជាចាំបាច់ ដែលមានគម្លាតពីដូស​មួយទៅដូសមួយទៀត មានរយៈពេលពី៣ខែឡើងទៅ។

ក្នុងករណីប្រជាពលរដ្ឋមានបញ្ហាសុខភាព ឬមានជំងឺ ឬសង្ស័យថា មានការឆ្លងជំងឺ សូមប្រញាប់​ទៅ​ស្វែងរកការពិនិត្យ​ ពិគ្រោះជំងឺនៅតាមមនី្ទរពេទ្យរដ្ឋ៕ អត្ថបទ រដ្ឋា