​អ៊ុយក្រែន៖ យោធា​រុស្ស៊ី​កាលពី​ថ្ងៃ​ចន្ទ​បាន​បញ្ចេញ​វីដេអូ​នៃ​អ្វីដែល​ខ្លួន​បាន​និយាយ​ថា ជា​ក្បួន​យន្តហោះ​ទម្លាក់​គ្រាប់​បែក Su-34 កំពុង​ធ្វើ​សកម្មភាព​ដោយ​បាន​បំផ្លាញ​ហេដ្ឋារចនាសម្ព័ន្ធ​យោធា​អ៊ុយ​ក្រែ​ន​។ ​

​វីដេអូ​ដែល​ចេញផ្សាយ​ដោយ​ក្រសួងការពារជាតិ​រុស្ស៊ី បង្ហាញ​យន្តហោះ​ទម្លាក់​គ្រាប់បែក​ល្បឿន​លឿន​ជាង​សំឡេង​បាន​ហោះ​ឡើង និង​ស្ថិត​នៅ​លើ​ដែនអាកាស​ប្រទេស​អ៊ុយ​ក្រែ​ន ក៏ដូចជា​បង្ហាញ​រូបភាព​ដែល​ខ្លួន​អះ​អាង​ថា​ ជា​គោលដៅ​ដែល​ត្រូវ​បាន​វាយប្រហារ​នៅ​អ៊ុយ​ក្រែ​ន​។ ជាមួយ​គ្នា​នេះយោធា​រុស្ស៊ី​កាលពី​ថ្ងៃ​ចន្ទ​បាន​អះអាងថា ​ខ្លួន​បាន​ធ្វើការ​វាយប្រហារ​លើ​អ្នក​ប្រយុទ្ធ​បរទេស​ដែល​កំពុង​ប្រយុទ្ធ​នៅ​ខាង​ភាគី​អ៊ុយ​ក្រែ​ន​។​ ​អ្នកនាំពាក្យ​ក្រសួងការពារជាតិ​លោក Igor Konashenkov បាន​និយាយថា ក្រុម​អ្នក​ប្រយុទ្ធ​ត្រូវបាន​តម្រង់​គោលដៅ​ដោយ​គ្រាប់​រ៉ុក្កែត​ស៊ី​ប​គោលដៅ​សមត្ថភាព​ខ្ពស់​តាម​អាកាស​នៅ​ទីក្រុង Konstantinovka។

លោក​បាន​និយាយ​ថា​ ក្រុម​អ្នក​ប្រយុទ្ធ​ប្រមាណ​ ២៥០​នាក់ និង​រថយន្ត​ ១៩​គ្រឿង​ត្រូវ​បាន​បំផ្លាញ​ក្នុង​ការវាយប្រហារ រួមទាំង​រថពាសដែក​ចំនួន ៧​គ្រឿង​។​ ​ក្រសួង​ក៏បាន​បញ្ចេញ​វីដេអូ​នៃ​អ្វីដែល​បាន​និយាយថា ​ជា​ប្រព័ន្ធ​មី​ស៊ី​ល Iskander-M កំពុង​ធ្វើ​សកម្មភាព​។​ លោក Konashenkov មិនបាន​ផ្តល់​ភស្តុតាង​អ្វី​បន្ថែមទៀត​នោះទេ ហើយ​សារព័ត៌មាន The Associated Press មិនមាន​ការផ្ទៀងផ្ទាត់​ពី​ការអះអាង​របស់លោក​ដោយ​ឯករាជ្យ​នោះដែរ៕

អត្ថបទ៖ ប៊ុនថន