ចិន៖ អ្នកនាំពាក្យក្រសួងការបរទេសចិន បានចោទអាមេរិកពីការចាប់ផ្តើមវិបត្តិនៅអ៊ុយក្រែន និងបញ្ឆេះជម្លោះ។ លោក Zhao Lijian បានប្រាប់អ្នកយកព័ត៌មាន នៅក្នុងសន្និសីទសារព័ត៌មានប្រចាំថ្ងៃកាលពីថ្ងៃអង្គារថា ទីក្រុងវ៉ាស៊ីនតោនគួរតែឈប់ដើរតួជានគរបាលពិភពលោក ហើយធ្វើការងារបង្កើតលក្ខខណ្ឌចរចាសន្តិភាពជំនួសវិញ។
លោក Zhao ត្រូវបានសួរអំពីការអត្ថាធិប្បាយនាពេលថ្មីៗនេះ ដោយអ្នកនាំពាក្យក្រសួងការបរទេសសហរដ្ឋអាមេរិកលោក Ned Price ដែលបានគំរាមកំហែងប្រទេសចិនជាថ្មីទៀត ដោយការលើកឡើងពីការខាតបង់យ៉ាងធ្ងន់ធ្ងរ ប្រសិនបើទីក្រុងប៉េកាំងជួយទីក្រុងមូស្គូ គេចចេញពីការដាក់ទណ្ឌកម្មរបស់លោកខាងលិច ទោះបីជាមិនមានភស្តុតាងដែលបញ្ជាក់ថា ចិនកំពុងធ្វើដូច្នេះក៏ដោយ។ លោក Zhao បាននិយាយថា ចិនប្រកាន់គោលជំហរដោយយុត្តិធម៌ និងឈរនៅខាងសន្តិភាព និងយុត្តិធម៌ នៅពេលនិយាយពីជម្លោះនៅអ៊ុយក្រែនដោយចោទសម្ដីរបស់លោក Price ថា សហរដ្ឋអាមេរិកធ្វើខ្លួនដូចជានគរបាលពិភពលោក។
លោក Zhao បានបន្ថែមថា ទីក្រុងវ៉ាស៊ីនតោនត្រូវតែ "បញ្ឈប់ការប្រឈមដាក់គ្នាក្នុងប្លុកនេះ និងបង្កើតសង្គ្រាមត្រជាក់ថ្មីទាញយកប្រយោជន៍ពីស្ថានការណ៍នេះ ដោយជំរុញឱ្យសហរដ្ឋអាមេរិកបញ្ឈប់ការដុតបញ្ឆេះឲ្យជម្លោះរីកកាន់តែធំ ហើយជំនួសវិញដោយការសម្របសម្រួល ការដោះស្រាយវិបត្តិឱ្យបានត្រឹមត្រូវតាមមធ្យោបាយប្រកបដោយការទទួលខុសត្រូវ និងបង្កើតបរិយាកាស និងលក្ខខណ្ឌចាំបាច់សម្រាប់ការចរចាសន្តិភាពរវាងភាគីពាក់ព័ន្ធ។ គួររម្លឹកថា នេះមិនមែនជាលើកទី១ ទេដែលប្រទេសចិនបានរុញបកទៅលើសម្ពាធរបស់សហរដ្ឋអាមេរិក ជាមួយលោកខាងលិចប្រឆាំងរុស្ស៊ីនៅក្នុងជម្លោះអ៊ុយក្រែននោះ៕
អត្ថបទ៖ សុខមាន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
