ភ្នំពេញ៖ ឯកឧត្តម ប្រាក់ គីមហុង អគ្គលេខាធិការរង គណៈកម្មាធិការជាតិគ្រប់គ្រងគ្រោះមហន្តរាយ បានឲ្យដឹងថា ទីបញ្ជាការប្រតិបត្តិការសង្គ្រោះបន្ទាន់ ត្រូវបានធ្វើទំនើបកម្មទាំងសម្ភារៈ និងបច្ចេកទេស ដើម្បីត្រៀមសម្រាប់បញ្ហាគ្រោះមហន្តរាយនាពេលខាងមុខ។

ថ្លែងប្រាប់BTV News នៅថ្ងៃទី២២ ខែកក្កដា ឆ្នាំ២០២២ ឯកឧត្តម ប្រាក់ គីមហុង អគ្គលេខាធិការរង នៃគណៈកម្មាធិការជាតិគ្រប់គ្រងគ្រោះមហន្តរាយ បានឱ្យដឹងថា ក្រោមការដឹកនាំ​របស់​សម្តេចតេជោ ហ៊ុន សែន នាយករដ្ឋមន្រ្តី និងជាប្រធានគណៈកម្មាធិការជាតិ​គ្រប់គ្រង​គ្រោះ​មហន្តរាយ និងឯកឧត្តម ទេសរដ្ឋមន្រ្តី គន់ គីម អនុប្រធានទី១​គណៈកម្មាធិការជាតិ​គ្រប់គ្រង​គ្រោះមហន្តរាយ តែងតែយកចិត្តទុកដាក់អំពីការឆ្លើយតបចំពោះបញ្ហាគ្រោះ​មហន្តរាយនានា​ដែលបាន​កើតឡើងជារៀងរាល់ឆ្នាំ ដោយបានដាក់ចេញនូវផែនការ និងយុទ្ធសាស្រ្ត សំដៅ​ជាយន្តការ​អនុវត្ត​សម្រាប់ក្រសួងស្ថាប័នពាក់ព័ន្ធ។

ឯកឧត្តម បន្តថា ដើម្បីធានាដល់ការអនុវត្តប្រតិបត្តិជួយសង្គ្រោះប្រជាពលរដ្ឋពី​គ្រោះមហន្តរាយ​បានកាន់តែមានប្រសិទ្ធភាព គឺតាមរយៈការធ្វើទំនើបកម្មទីបញ្ជាការប្រតិបត្តិការសង្គ្រោះបន្ទាន់ ដោយ​ផ្តោតលើឧបករណ៍សម្ភារបច្ចេកទេស ​និងការបង្កើតកងឯកភាពដើម្បីជួយសង្គ្រោះជាដើម។

ឯកឧត្តម ប្រាក់ គីមហុង បានបញ្ជាក់ថា ការធ្វើទំនើបកម្មទីបញ្ជាការប្រតិបត្តិការសង្រោះបន្ទាន់នេះ ក៏ជាការួមចំណែក និងត្រៀមរួចរាល់សម្រាប់ការឆ្លើយតបចំពោះបញ្ហាគ្រោះមហន្តរាយ​នៅកម្ពុជា​នារដូវវស្សា ខណៈឆ្នាំនេះ ការប្រឈមពីជំនន់ទឹកភ្លៀងបានកំពុងកើតឡើងជាបន្តបន្ទាប់។

បន្ថែសលើសពីនេះ ឯកឧត្តម ប្រាក់ គីមហុង ​បានណែនាំឲ្យប្រជាពលរដ្ឋរស់នៅតំបន់ងាយប្រឈម​ដោយសារ​ទឹកជំនន់ តាមដានរាល់ព័ត៌មានពាក់ព័ន្ធនឹងបញ្ហាអាកាសធាតុ ឬប្រព័ន្ធផ្តល់ដំណឹងលេខ ១២៩៤ របស់គណៈកម្មាធិការគ្រប់គ្រងគ្រោះមហន្តរាយ ​ដើម្បីជាការត្រៀមលក្ខណៈ និងទទួលបានកិច្ចសហការ ជួយសង្គ្រោះបានទាន់ពេលវេលា៕ អត្ថបទ៖ ឧត្តម