មណ្ឌលគិរី៖ រយៈពេលប្រហែល២ខែចុងក្រោយនេះ ខេត្តមណ្ឌលគិរី បានទទួលរងនូវស្ថានភាព​ភ្លៀងធ្លាក់ញឹកញាប់ ពោលគឺទាំង ពីអំឡុងចុងខែឧសភា រហូតមកដល់ពេលនេះ ប៉ុន្តែទោះបី​មាន​ភ្លៀង​ធ្លាក់​ញឹកញាប់​ក្ដី ​ខេត្តមណ្ឌលគិរី ​មិនបានរងគ្រោះធ្ងន់ធ្ងរ ដោយជំនន់ទឹកភ្លៀងនោះទេ ។

នៅក្នុងខែកក្កដានេះ ​ស្ថានភាពអាកាសធាតុនៅទូទាំងខេត្តមណ្ឌលគិរី ​បានរង​ឥទ្ធិពល​ភ្លៀង​រលឹម​ទៅខ្លាំងស្ទើររៀង រាល់ថ្ងៃ ​ហើយកាលពីអំឡុងចន្លោះថ្ងៃទី៩ ​ដល់ថ្ងៃទី១៣កក្កដានេះ ​ព្រោះតែ​មាន​ភ្លៀងធ្លាក់​មិនឈប់ ​ក៏បានធ្វើឲ្យឃុំមួយចំនួន​ នៅក្នុងស្រុក​កែវសីមា​ រងនូវ​ជំនន់​ទឹកភ្លៀងទឹក ក៏បាន​ស្រកទៅវិញ​ដោយ​មិនបាន​បង្ក​ភាព​ធ្ងន់ធ្ងរ​ទៅដល់ប្រជាពល រដ្ឋនោះទេ។

យ៉ាងណាក៏ដោយ ប្រហែល១សប្ដាហ៍ចុងក្រោយនេះ ​អាកាសធាតុ​ក្នុងខេត្តមណ្ឌលគិរី ពិសេស​ក្នុងក្រុងសែន មនោរម្យ នៅតែមាន​ធ្លាក់អ័ព្ទ​ពេល​ព្រឹកព្រលឹម​ និងមានធ្លាក់ភ្លៀងខ្លះៗដែរ ប៉ុន្តែមាន​ពេលបើកថ្ងៃស្រឡះច្រើន ​ដែលអាច​ បង្កលក្ខណៈឲ្យប្រជាពលរដ្ឋចេញក្រៅ ដើម្បីប្រកបរបរ​ផ្សេងៗបាន។

ជាក់ស្ដែងនៅថ្ងៃទី២២កក្កដា នេះ តាំង​ពី​ព្រឹកព្រលឹម​ រហូត​ដល់​វេលាថ្ងៃទីត្រង់ ​ផ្ទៃ​មេឃស្រឡះល្អ ពុំមាន​ភ្លៀងធ្លាក់ទេ​ ហើយក៏ពុំមានសេចក្ដី​រាយការណ៍​អំពីគ្រោះ​ទឹកជំនន់​ នៅតំបន់ណាដែរ ៕

អត្ថបទ៖ អ៊ិត ភីរុណ