ភ្នំពេញ៖ ឯកឧត្តមបណ្ឌិត ឈឹម ឃិនដារ៉េត អគ្គលេខាធិការ អាជ្ញាធរជាតិប្រយុទ្ធនឹងជំងឺអេដស៍ និងជាប្រធានក្រុមប្រឹក្សាបច្ចេកទេស បានអញ្ជើញដឹកនាំកិច្ចប្រជុំក្រុមប្រឹក្សាបច្ចេកទេសលើកទី៧ ឆ្នាំ២០២២ ដើម្បីរៀបចំផែនការយុទ្ធសាស្រ្តជាតិលុបបំបាត់ជំងឺអេដស៍។

ក្នុងកិច្ចប្រជុំរបស់អាជ្ញាធរជាតិប្រយុទ្ធនឹងជំងឺអេដស៍ ធ្វើឡើងតាមប្រព័ន្ធ ZOOM និងដោយផ្ទាល់នៅ​អាជ្ញាធរជាតិប្រយុទ្ធនឹងជំងឺអេដស៍ មានការអញ្ជើញចូលរួមពីឯកឧត្តម លោកជំទាវ លោក លោកស្រី ជាសមាជិក សមាជិកា អញ្ជើញមកពីក្រសួង ស្ថាប័ន រាជធានី ខេត្ត និងអង្គការដៃគូ​ពាក់ព័ន្ធ​ដែលធ្វើការងារអេដស៍ទាំងអស់​ និងមានគោលបំណងលើកចំណុចគន្លឹះ អំពីតួនាទីរបស់​អាជ្ញាធរជាតិប្រយុទ្ធនឹងជំងឺអេដស៍ ​និងតួនាទីរបស់ក្រុមប្រឹក្សាបច្ចេកទេស និងតួនាទី​ក្រុម​យុទ្ធសាស្ត្រ។

ឯកឧត្តមបណ្ឌិត ឈឹម ឃិនដារ៉េត បានសង្កត់ធ្ងន់ថា ជាយុទ្ធសាស្រ្តដែលបានធ្វើនាពេលនេះ គឺការ​ផ្សព្វផ្សាយបង្ការ ធ្វើយ៉ាងណាកុំឲ្យមានការឆ្លងមេរោគអេដស៍ថ្មី ជាពិសេសក្នុងចំណោមប្រជាជន​គន្លឹះ ដែលកំពុងព្រួយបារម្ភនោះ គឺក្រុមបុរស រួមភេទជាមួយបុរស ដែលមានគ្នារហូត​ដល់ទៅជិត​៩ម៉ឺននាក់ ​និងមានអាត្រាប្រេវ៉ាឡង់ខ្ពស់ ដែលមានចំនួន៤% បើប្រៀបធៀបជាមួយចំនួន​ប្រជាជន​ទូទៅ០.៥% និងតាមការសិក្សាស្រាវជ្រាវ ​គឺការប្រើប្រាស់ស្រោមអនាម័យរបស់ពួកគាត់ នៅ​កម្រិតទាប នេះជាចំណុច​ដែលយើងកំពុងគិតពិចារណា ​និងអ្វីដែលសំខាន់ គឺការបង្ការ។

ដូច្នេះទាមទារឲ្យមានការចូលរួមពីគ្រប់ស្ថាប័ន ​អង្គការដៃគូរសង្គមស៊ីវិលទាំងអស់ ធ្វើការអប់រំ ផ្សព្វផ្សាយ​ និងបងប្អូនអ្នកផ្ទុកមេរោគអេដស៍ ទន្ទឹមនឹងនោះបងប្អូន​ដែល​សង្ស័យថា​ ផ្ទុកមេរោគ​អេដស៍ ​សូមឲ្យចូលមករកសេវាធ្វើតេស្តរកមេរោគអេដស៍។

ជាពិសេសសម្រាប់ប្រទេសកម្ពុជា ការធ្វើតេស្តឈាមរកមេរោគអេដស៍ និងព្យាបាលមេ​រោគ​អេដស៍នេះ​ គឺមិនគិតប្រាក់នោះទេ​ ដូចនេះសូមចូលរួមទាំងអស់គ្នា ដើម្បីឲ្យទទួល​សេវា​ព្យាបាល​បានទាន់ពេលវេលា ​និងមានសុខភាពល្អ​ ដូចប្រជាពលរដ្ឋទូទៅផងដែរ៕ អត្ថបទ រដ្ឋា