រុស្ស៊ី៖ រដ្ឋមន្ត្រីការបរទេសរុស្ស៊ីលោក Sergei Lavrov បាននិយាយនៅប្រទេសអេហ្ស៊ីបដោយបានច្រានចោលពីការអះអាងថា ទីក្រុងមូស្គូបានបង្កឱ្យមានវិបត្តិស្បៀងអាហារពិភពលោក។ នៅក្នុងសុន្ទរកថាទៅកាន់ឯកអគ្គរដ្ឋទូតសម្ព័ន្ធអារ៉ាប់នៅទីក្រុងគែរ លោកបាននិយាយថា ប្រទេសលោកខាងលិចកំពុងបំភ្លៃការពិតអំពីផលប៉ះពាល់ នៃទណ្ឌកម្មលើសន្តិសុខស្បៀងពិភពលោក។
លោកបានចោទប្រទេសលោកខាងលិចថា បានព្យាយាមដាក់ឥទ្ធិពលរបស់ខ្លួនលើប្រទេសដទៃ។ ភាគច្រើននៃពិភពអារ៉ាប់ និងទ្វីបអាហ្វ្រិកបានរងផលប៉ះពាល់ធ្ងន់ធ្ងរដោយកង្វះគ្រាប់ធញ្ញជាតិ ដែលបណ្តាលមកពីសង្គ្រាមរបស់រុស្ស៊ីនៅអ៊ុយក្រែន។ កិច្ចព្រមព្រៀងសំខាន់មួយត្រូវបានចុះហត្ថលេខាកាលពីថ្ងៃសុក្រ ដើម្បីបន្តការនាំចេញគ្រាប់ធញ្ញជាតិរបស់អ៊ុយក្រែនដែលបានជាប់គាំងនៅក្នុងប្រទេសនេះ។ លោក Lavrov បាននិយាយថា ភាពឆេវឆាវរបស់បណ្តាប្រទេសលោកខាងលិចក្នុងការដាក់ទណ្ឌកម្មលើប្រទេសរុស្ស៊ី បានបង្ហាញពីការសន្និដ្ឋានសាមញ្ញថា វាមិនមែនអំពីបញ្ហាអ៊ុយក្រែននោះទេ វាជាអនាគតនៃសណ្តាប់ធ្នាប់ពិភពលោក។
បន្ទាប់ពីកិច្ចពិភាក្សាជាមួយលោក Sameh Shoukry រដ្ឋមន្ត្រីការបរទេសអេហ្សីប លោក Lavrov បានថ្លែងក្នុងសន្និសីទសារព័ត៌មានរួមគ្នាថា លោកខាងលិចកំពុងអូសបន្លាយជម្លោះ ទោះបីជាខ្លួនយល់ថា អ្វីនៅចុងក្រោយនឹងទៅជាយ៉ាងណាក៏ដោយ។ ធនាគារអភិវឌ្ឍន៍អាហ្វ្រិកបាននិយាយថា អ៊ុយក្រែន និងរុស្ស៊ីជាធម្មតាផ្គត់ផ្គង់ច្រើនជាង 40% នៃស្រូវសាលីរបស់អាហ្វ្រិក។ អេហ្ស៊ីបជាធម្មតាជាអ្នកប្រើប្រាស់ច្រើននៃស្រូវសាលីអ៊ុយក្រែន។ កាលពីឆ្នាំ2019 ប្រទេសនេះបាននាំចូលស្រូវសាលី 3.62លានតោនច្រើនជាងប្រទេសណាៗទាំងអស់។ លោក Lavrov និយាយថា ទណ្ឌកម្មរបស់លោកខាងលិចដែលដាក់លើប្រទេសរុស្ស៊ី បានធ្វើឱ្យមានទំនោរអវិជ្ជមានកាន់តែខ្លាំងឡើងនៅក្នុងទីផ្សារស្បៀងអាហារអន្តរជាតិ ដែលកើតចេញពីជំងឺរាតត្បាត៕
អត្ថបទ៖ ប៊ុនថន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
