ឧត្តរមានជ័យ៖ នៅព្រឹកថ្ងៃទី២៦កក្កដាឆ្នាំ២០២២ ប្រជាពលរដ្ឋប្រជាង ១០០គ្រួសារនៅក្នុងសង្កាត់អូរស្មាច់ ក្រុងសំរោង ខេត្តឧត្តរមានជ័យ ស្នើឱ្យ​អាជ្ញាធរសង្កាត់អូរស្មាច់ ជួយអន្តរាគមន៍​បើកផ្លូវឡើងវិញ ខណៈពលរដ្ឋពីរគ្រួសារធ្វើរបងបិទផ្លូវ កាលពីសប្តាហ៍មុន នៅ​ចំណុចភូមិរួតប៉ី សង្កាត់អូរស្មាច់ ក្រុងសំរោង ខេត្តឧត្តរមានជ័យ។

ពលរដ្ឋឈ្មោះ សេង ហោ រស់នៅសង្កាត់អូរស្មាច់ បានឱ្យដឹងថា ផ្លូវ​ក្រាល​គ្រួសក្រហមមួយខ្សែនេះ កន្លងមក​ពលរដ្ឋ​ម្ចាស់ដី​បាន​បរិច្ចាគ​ធ្វើផ្លូវ​ដើម្បី​ឱ្យពលរដ្ឋ​ក្នុង​សង្កាត់អូរស្មាច់​ទាំងអស់​ធ្វើដំណើរឆ្លងកាត់។

លោក បន្តថា ប្រជាពលរដ្ឋបានធ្វើដំណើរលើផ្លូវនេះអស់រយៈពេលជាង ១០ឆ្នាំមកហើយ​ដោយការ​ធ្វើដំណើរឆ្លងកាត់គ្រប់មធ្យោបាយតាមផ្លូវមួយនេះ​មិនដែល​មានបញ្ហាអ្វីនោះឡើយ។ស្រាប់តែពេលនេះ​ ​ម្ចាស់​ដី​ដែល​ជា​ប់​ព្រំគ្នា​ទាំងពីរ​​ធ្វើការ​​បោះបង្គោល​ដាក់​របងលួស​បិទ​ផ្លូវនេះ​ទៅវិញ​ដោយមិនឱ្យ​ពលរដ្ឋធ្វើដំណើរឆ្លងកាត់បន្តទៀតបាននោះទេ។

ពាក់ព័ន្ធទៅនឹងករណីខាងលើនេះ​លោក ផេម សំអាត ​ចៅសង្កាត់រងអូរស្មាច់ មិនអាច​សម្រប​សម្រួល​ធ្វើការ​អន្តរាគមន៍ដោះជូន​ពលរដ្ឋបាននោះទេ រងចាំលោកចៅសង្កាត់មកពីប្រជុំវិញ។

គូសបញ្ជាក់ថា កន្លងមកពលរដ្ឋបាននាំគ្នាមកតវ៉ាសុំ​ឲ្យជួយ​អន្តរាគមន៍​បើកផ្លូវនេះឡើងវិញ​ម្តងរួចមក​ហើយនៅ​សង្កាត់ប៉ុន្តែលោក​ អ៊ុក ប៊ុនហេង ​ដែលជាចៅសង្កាត់អូរស្មាច់ ប្រាប់ថា លោក​មិន​មាន​សិទ្ធិ​ដោះស្រាយជូនទេលោក នឹងបញ្ជូនរឿងនេះ​ទៅ​ដោះស្រាយ​បន្តនៅឯសាលាក្រុង។ករណីនេះ BTV News មិន​អាច​សុំការ​បំភ្លឺ​ពី​ម្ចាស់​ដី​បាន​នៅឡើយទេ ដោយពុំស្គាល់​លេខ​ទំនាក់ទំនង​៕អត្ថបទ៖ ឃិន សារិទ្ធិ