​​អ៊ុយ​ក្រែ​ន៖ ប្រធានាធិបតី​អ៊ុយ​ក្រែ​ន​លោក Volodymyr Zelenskyy កាលពី​ថ្ងៃ​អង្គារ​បាន​និយាយថា យោធា​រុស្ស៊ី​បាន​បាត់​បង់ជីវិត​ជិត ​៤​ម៉ឺន​នាក់​ចាប់តាំងពី​សង្គ្រាម​ចាប់ផ្តើម​។ នៅក្នុង​សុន្ទរកថា​ប្រចាំថ្ងៃលោក Zelenskyy បាន​ថ្កោលទោស​ការវាយប្រហារ​ចុងក្រោយ​លើ​ទីក្រុង​កំពង់ផែ Odesa។

រុស្ស៊ី​បានដាក់​គោលដៅ​លើ​ទីក្រុង Odesa ដោយ​ការវាយប្រហារ​តាម​អាកាស​កាលពី​ថ្ងៃ​អង្គារ ដោយបាន​វាយប្រហារ​ទៅលើ​អគារ​ឯកជន និង​ហេដ្ឋារចនាសម្ព័ន្ធ​កំពង់ផែ ប្រើប្រាស់​គ្រាប់​មី​ស៊ី​លបាញ់​ចេញពី​យន្តហោះ​ទម្លាក់​គ្រាប់បែក​រយៈ​ចម្ងាយ​ឆ្ងាយ​។ មី​ស៊ី​ល​ដែល​បាន​ប្រើប្រាស់ត្រូវបាន​រៀបចំឡើង​ដើម្បី​បំផ្លាញ​នាវាចម្បាំង និង​គោលដៅ​សំខាន់ៗ​ផ្សេងទៀត​។​ នៅ​ថ្ងៃ​អង្គារ​ដដែល​នេះ​ដែរប្រធានាធិបតី​អ៊ុយ​ក្រែ​ន​លោក Volodymyr Zelenskyy បានបង្ហាញ​ខ្លួន​តាម​បណ្តាញ​ត​ភ្ជាប់​វីដេអូ​នៅក្នុង​ពិធី​មួយ​នៅ​ទីក្រុង​ឡុង​ដ៍ ដើម្បី​ទទួល​ពានរង្វាន់​ភាពជា​អ្នកដឹកនាំ Winston Churchill។​

​ដោយ​អរគុណ​ដល់​អង្គការ​ស​ង្គ​ម Churchill អន្តរជាតិ និង​នាយករដ្ឋមន្ត្រី​អង់គ្លេសលោក Boris Johnson ដែល​បានប្រគល់​រង្វាន់​ដល់​លោក លោក​ Zelenskyy បាន​ដកស្រង់​សម្តី​របស់លោក Churchill នៅពេលដែល​បានបញ្ចប់​សង្គ្រាមលោកលើកទី2 នៅ​អឺរ៉ុប​។ មេដឹកនាំ​អ៊ុយ​ក្រែ​ន​បាន​និយាយថា លោក Johnson សម​នឹង​ទទួលបាន​ពានរង្វាន់​នេះ​ច្រើនជាង ដោយ​បង្ហាញ​ពី​ភាពជា​អ្នកដឹកនាំ​រួមគ្នា អ៊ុយ​ក្រែ​ន អង់គ្លេស និង​មនុស្ស​គ្រប់គ្នា​នឹងមិន​បោះបង់​សេរីភាព​ចំពោះ​ជន​ផ្តាច់ការ​មួយចំនួន ទោះបីជា​ពួកគេ​ប្រើ​អាវុធ​អ្វី​ប្រឆាំងនឹង​យើង​ក៏ដោយ​៕

អត្ថបទ៖ ប៊ុនថន