ភ្នំពេញ៖ មួយរយៈចុងក្រោយនេះ ការធ្វើចរាចរមនុស្សចេញចូលប្រទេសថៃ ឆ្លងកាត់​តាម​ច្រក​ព្រំដែន​អន្តរជាតិអូរស្មាច់ ខេត្តឧត្ដរមានជ័យ ហាក់មានសភាពស្ងប់ស្ងាត់ តែទោះជាយ៉ាងណា មន្ត្រីពាក់ព័ន្ធទាំងអស់ ដែលឈរជើងប្រចាំការនៅច្រកទ្វារនេះ ​នៅតែបន្តយកចិត្តទុកដាក់ក្នុងការ​អនុវត្តវិធាន​ការទប់ស្កាត់ការនាំចូលជំងឺកូវីដ-១៩ ឬអុតស្វា ។

លោក ហ៊ូ តារារិទ្ធ ប្រធានច្រកទ្វារព្រំដែនអន្តរជាតិអូរស្មាច់ ខេត្តឧត្តរមានជ័យ បានឲ្យដឹងថា បច្ចុប្បន្ននេះ​ អ្នកដំណើរឆ្លងដែនចេញចូលទៅប្រទេសថៃ ​តាមច្រកអូរនេះ ​មានតិចតួចប៉ុណ្ណោះ តែទោះជាបែបនេះក្ដីមន្ត្រីពាក់ព័ន្ធទាំងអស់ ​នៅតែបន្តនិងកាន់តែពង្រឹងការត្រួតពិនិត្យ ដើម្បីធានាថា ពួកគេគ្មាននាំ ជំងឺកូវីដ-១៩ ឬអុតស្វា មកចម្លងបន្ថែមក្នុងសហគមន៍។

ការរឹតបន្តឹងនេះ បន្ទាប់ពីបុរសជនជាតិនីហ្សេរីយ៉ា ដែលត្រូវគេដឹងថា ​បានរត់គេចចេញពីប្រទេសថៃ មកកម្ពុជា កាលពីពេលថ្មីៗនេះ មានជំងឺអុតស្វា។

លោក បានបញ្ជាក់ថា មួយរយៈចុងក្រោយនេះ ក្នុងចំណោមប្រជាពលរដ្ឋ ​ដែលបានឆ្លងដែលចេញ ចូល​ប្រទេសថៃ មិនត្រូវបានរកឃើញមានឆ្លងជំងឺកូវីដ-១៩នោះទេ ​ព្រោះពួកគេបានចាក់វ៉ាក់សាំង​គ្រប់ដូសអស់ហើយ។

លោកប្រធានច្រកទ្វារព្រំដែនអូរស្មាច់ ​បានបញ្ជាក់ថា​ ភាពស្ងប់ស្ងាត់​នៃ​ចរាចរមនុស្សឆ្លងកាត់ព្រំ ដែនអូរស្មាច់​ ម្យ៉ាងក៏ដោយសារ​ ប្រជាពលរដ្ឋ ​បានងាកទៅធ្វើដំណើរចូលប្រទេសថៃ តាមច្រក​ជាំសាងាំ ក្នុងទឹកដីខេត្តអន្លង់វែងវិញ ​ដែលនៅទីនោះ ​ភាគីអាជ្ញាធរកម្ពុជា-ថៃ មួយរយៈចុង​ក្រោយនេះ មានការសម្របសម្រួលគ្នាល្អ ​ផ្ដល់ភាពងាយស្រួលចំពោះអ្នកដំណើរ ពិសេស​នោះចំពោះ​អ្នកជំងឺ ដែលមានសភាពធ្ងន់ធ្ងរ ៕ អត្ថបទ៖ ឃិន សារិទ្ធ