រុស្ស៊ី៖ រដ្ឋមន្ត្រីការបរទេសរុស្ស៊ីកាលពីថ្ងៃពុធបានបដិសេធថា ប្រទេសរបស់លោកមិនមានទំនួលខុសត្រូវចំពោះការកើនឡើងតម្លៃស្បៀងអាហារសកល បន្ទាប់ពីការវាយលុករបស់ខ្លួនលើអ៊ុយក្រែនដោយបានច្រានចោល អ្វីដែលគេចាត់ទុកថាវិបត្តិស្បៀងអាហារ ខណៈលោកបានបញ្ចប់ដំណើរទស្សនកិច្ចទៅកាន់ប្រទេសអាហ្វ្រិកជាច្រើន នៅទ្វីបដែលរងផលប៉ះពាល់ខ្លាំង។
ថ្លែងទៅកាន់អ្នកសារព័ត៌មាន និងអ្នកការទូតអាហ្វ្រិកនៅរដ្ឋធានី Addis Ababa របស់ប្រទេសអេត្យូពី លោក Sergey Lavrov បានចោទប្រកាន់សហរដ្ឋអាមេរិក និងបណ្តាប្រទេសអឺរ៉ុបថា បានជំរុញឱ្យតម្លៃទំនិញឡើងថ្លៃដោយបន្តអនុវត្តគោលនយោបាយបៃតងមិនប្រុងប្រយ័ត្ន និងស្តុកទុកស្បៀងអាហារក្នុងអំឡុងពេលជំងឺរាតត្បាត COVID-19។ លោក Lavrov បាននិយាយថា ស្ថានភាពក្នុងប្រទេសអ៊ុយក្រែនបានជះឥទ្ធិពលអវិជ្ជមាន បន្ថែមទៅលើទីផ្សារស្បៀងអាហារ ប៉ុន្តែមិនមែនដោយសារតែប្រតិបត្តិការពិសេសរបស់រុស្ស៊ីនោះទេ ផ្ទុយទៅវិញដោយសារតែប្រតិកម្មខ្វះចន្លោះរបស់លោកខាងលិចដែលបានប្រកាសដាក់ទណ្ឌកម្ម។
ប្រទេសអាហ្វ្រិកជាច្រើនបានពឹងផ្អែកយ៉ាងខ្លាំងលើការនាំចូលស្រូវសាលីពីប្រទេសរុស្ស៊ី និងអ៊ុយក្រែន ហើយមេដឹកនាំអាហ្វ្រិកកាលពីប៉ុន្មានសប្តាហ៍មុនបានធ្វើទស្សនកិច្ចទៅកាន់ទីក្រុងមូស្គូ ដើម្បីបង្ហាញពីកង្វល់សន្តិសុខស្បៀងរបស់ពួកគេ។ ប៉ុន្តែប្រទេសអាហ្វ្រិកជាច្រើនមិនបានរិះគន់រុស្ស៊ីដោយបើកចំហ ជុំវិញការវាយលុកលើអ៊ុយក្រែននោះទេ។ លោក Lavrov ក្នុងដំណើរទស្សនកិច្ចនៅទ្វីបអាហ្វ្រិក លោកបានស្វែងរកការធានាឡើងវិញចំពោះមេដឹកនាំដែលព្រួយបារម្ភ អំពីការកើនឡើងតម្លៃគ្រាប់ធញ្ញជាតិ និងបង្ហាញពីភាពត្រឹមត្រូវនៃការវាយលុករបស់រុស្ស៊ីលើអ៊ុយក្រែន ដែលលោកចាត់ទុកថាការគំរាមកំហែងនៅព្រំដែនរុស្ស៊ី៕
អត្ថបទ៖ ប៊ុនថន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
