កំពង់ឆ្នាំង ៖ ត្រីមេពូជ និងកូនត្រីពូជ៧ប្រភេទចំនួន៦ម៉ឺនក្បាល ត្រូវបានអាជ្ញាធរខេត្តកំពង់ឆ្នាំង លែងក្នុងបឹងឈ្វាំងសែនជ័យ ស្ថិតក្នុងឃុំរលាប្អៀរ ស្រុករលាប្អៀរ ដើម្បីចូលរួមអបអរសាទរទិវាមច្ឆជាតិ ១កក្កដា និងទុកជាប្រយោជន៍សម្រាប់បងប្អូនប្រជាពលរដ្ឋផងដែរ។
ពិធីលែងកូនត្រី និងមេត្រីពូជនេះបានធ្វើនាថ្ងៃទី២៨ ខែកក្កដា ឆ្នាំ២០២២ ក្រោមអធិបតីភាពឯកឧត្តម បណ្ឌិតសភាចារ្យ អ៊ុក រ៉ាប៊ុន រដ្ឋមន្រ្តីក្រសួងអភិវឌ្ឍន៍ជនបទ, ឯកឧត្តម ឡុង ឈុនឡៃ ប្រធានក្រុមប្រឹក្សាខេត្ត និងឯកឧត្តម ស៊ុន សុវណ្ណារិទ្ធិ អភិបាលខេត្តកំពង់ឆ្នាំង និងលោក លោកស្រី ជាថ្នាក់ដឹកនាំមន្ទីរអង្គភាពជុំវិញខេត្ត ប្រជាពលរដ្ឋ សិស្សានុសិស្ស យ៉ាងច្រើនកុះករផងដែរ ។
លោក ងិន ហ៊ុន ប្រធានមន្ទីរកសិម្មរុក្ខាប្រម៉ាញ់ និងនេសាទខេត្តកំពង់ឆ្នាំងបានឱ្យដឹងថា នៅក្នុងទិវាមច្ឆជាតិនាឆ្នាំនេះ ខេត្តកំពង់ឆ្នាំងបានលែងកូនត្រីពូជ និងមេពូជត្រីចំនួន ៦ម៉ឺនក្បាលចូលទៅក្នុងអាងទឹកឈ្វាំងសែនជ័យ ស្ថិតក្នុងឃុំរលាប្អៀរ ស្រុករលាប្អៀរ ខេត្តកំពង់ឆ្នាំង ដែលមានត្រីរ៉ស់ ត្រីអណ្តែង ត្រីក្រាញ់ ត្រីខ្យា ត្រីព្រលូង និងត្រីកាហែរ ដើម្បីការពារ និងអភិរក្សធនធានជលផល ខណ្ឌរដ្ឋបាលជលផលខេត្តកំពង់ឆ្នាំង រួមជាមួយអាជ្ញាធរមានសមត្ថកិច្ចបានបង្រ្កាប និងទប់ស្កាត់បទល្មើសនេសាទគ្រប់ប្រភេទ ដែលបានកើតឡើងនៅក្នុងមូលដ្ឋានក្នុងខេត្តកំពង់ឆ្នាំង ជាក់ស្តែងបានបង្រ្កាបបទល្មើសជលផល១៣២ករណី មានរបាំងស្បៃមុង២៨៤កន្លែង លូស្បៃមុង២៩៤លូ របាំងសាច់អួនចំនួន២២៥កន្លែង លួសាច់អួន៣១៤លូ សម្រាស់១៧៧កន្លែង និងចាក់លែងកូនត្រីក្នុងដែននេសាទបាន ១៥៧០គីឡូក្រាម ។
ឯកឧត្តមបណ្ឌិតសភាចារ្យ អ៊ុក រ៉ាប៊ុន រដ្ឋមន្រ្តីក្រសួងអភិវឌ្ឍន៍ជនបទ បានថ្លែងថា៖ ការប្រារព្ធពិធីលែងកូនត្រីពូជនេះ ដើម្បីបំផុសមហាជនឱ្យមានស្មារតីចូលរួមការពារ អភិរក្ស និងអភិវឌ្ឍន៍ធនធានជលផលក្នុងប្រទេសយើងឱ្យមានភាពប្រសើរឡើង ស្របទៅតាមគោលនយោបាយរបស់រាជរដ្ឋាភិបាល និងកម្មវិធីកំណែទម្រង់វិស័យជលផល ដោយបានលុបឡូត៍នេសាទទាំងអស់ ហើយបានប្រគល់សិទ្ធិអំណាចទៅឱ្យសហគមន៍គ្រប់គ្រង និងរៀបចំផែនការសម្រាប់អភិវឌ្ឍន៍មូលដ្ឋានរបស់ខ្លួន ។ ដើម្បីធានាបាននូវនិរន្តរភាពធនធានជលផល អាជ្ញាធរ និងមន្រ្តីជំនាញត្រូវមានភារកិច្ចធ្វើការផ្សព្វផ្សាយច្បាប់ស្តីពីជលផល លិខិតបទដ្ឋានគតិយុត្តិនានា ជូនដល់ប្រជាពលរដ្ឋឲ្យបានទូលំទូលាយ ត្រូវធ្វើការបង្កា្របបទល្មើសនេសាទឲ្យមានប្រសិទ្ធិភាព ដោយធ្វើការសហការណ៍ជាមួយអាជ្ញាធរមូលដ្ឋាន កងកម្លាំង និងមន្ទីរពាក់ព័ន្ធ បំផុសការអភិវឌ្ឍវារីវប្បកម្ម ពង្រឹងសមត្ថភាពដល់មន្រ្តីជំនាញ សហគមន៍នេសាទដែលបានបង្កើតរួចឲ្យបានរឹងមាំ។ ត្រូវចាត់វិធានការ លើជនល្មើសបំផ្លាញព្រៃលិចទឹក និងរក្សាព្រៃលិចទឹកឲ្យបានគង់វង្ស ជាពិសេសគឺធ្វើការទប់ស្កាត់ និងអំពាវនាវដល់បងប្អូនកុំឲ្យធ្វើការនេសាទខុសច្បាប់ ដែលនាំឲ្យវិនាសពូជត្រីទាំងស្រុងនាពេលអនាគត។ ការអភិវឌ្ឍប្រកបដោយចីរភាពគឺជាការធ្វើឱ្យមានការផ្លាស់ប្តូរជាវិជ្ជមានក្នុងពេលបច្ចុប្បន្ន ដោយមិនបង្កអោយមានវិនាសកម្មដល់ថ្ងៃអនាគត ។ ថ្ងៃនេះយើងបានបំពេញបន្ថែមឱ្យទៅធម្មជាតិវិញ ក្នុងគោលបំណងស្តារតុល្យភាពរវាងការអភិវឌ្ឍនិងការអភិរក្ស តាមរយៈការធានានិរន្តរភាព នៃជីវៈចម្រុះ ដើម្បីចីរភាពនៃប្រព័ន្ធអេកូឡូហ្សីផងដែរ៕ អត្ថបទ៖ ហុង វាស្នា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
