ទួរគី៖ រដ្ឋមន្ត្រីការពារជាតិទួរគីនិយាយថា ការត្រៀមរៀបចំ និងផែនការកំពុងដំណើរការសម្រាប់នាវាដំបូង ដែលគ្រោងនឹងដឹកជញ្ជូនគ្រាប់ធញ្ញជាតិអ៊ុយក្រែនជាប់គាំងនៅកំពង់ផែសមុទ្រខ្មៅ។ លោក Hulusi Akar បានធ្វើអត្ថាធិប្បាយកាលពីថ្ងៃពុធនៅក្នុងពិធីសម្ពោធមជ្ឈមណ្ឌលគ្រប់គ្រងមួយ ដែលត្រូវបានផ្តល់ភារកិច្ចក្នុងការសម្របសម្រួលការនាំចេញគ្រាប់ធញ្ញជាតិ តាមរយៈច្រករបៀងសុវត្ថិភាពនៅសមុទ្រខ្មៅ។
មជ្ឈមណ្ឌលសម្របសម្រួលរួម ឬ JCC ត្រូវបានបង្កើតឡើងនៅទីក្រុងអ៊ីស្តង់ប៊ុល ប្រទេសទួរគី ស្របតាមកិច្ចព្រមព្រៀងគាំទ្រដោយអង្គការសហប្រជាជាតិដែលបានចុះហត្ថលេខាកាលពីសប្តាហ៍មុន អនុញ្ញាតឱ្យប្រទេសរុស្ស៊ីដឹកជញ្ជូនគ្រាប់ធញ្ញជាតិ និងជីរបស់ខ្លួន។ លោក Akar និយាយថា បុគ្គលិកដែលបម្រើការនៅមជ្ឈមណ្ឌលនេះបានដឹងថា ការសម្លឹងមើលរបស់ពិភពលោកកំពុងពឹងផ្អែកលើពួកគេ។ មជ្ឈមណ្ឌល JCC ត្រូវបានរៀបចំបុគ្គលិកដោយមានមន្ត្រីយោធា និងស៊ីវិលចំនួនប្រាំនាក់មកពីប្រទេសរុស្ស៊ី អ៊ុយក្រែន ទួរគី និងអង្គការសហប្រជាជាតិ។
លោកបានបន្តថា មជ្ឈមណ្ឌលនឹងតាមដានសកម្មភាពរបស់នាវាដឹកគ្រាប់ធញ្ញជាតិ តាមរយៈផ្កាយរណប និងមធ្យោបាយផ្សេងទៀត។ លោក Akar បាននិយាយថា ប្រទេសទួរគីកំពុងអំពាវនាវឱ្យភាគីទាំងអស់គោរពតាមកិច្ចព្រមព្រៀង ដែលគាំទ្រដោយអង្គការសហប្រជាជាតិក្នុងការយោងជាក់ស្តែង ចំពោះការវាយប្រហារកាលពីចុងសប្តាហ៍នៅលើទីក្រុងកំពង់ផែ Odesa ក្នុងរយៈពេលមិនដល់មួយថ្ងៃ បន្ទាប់ពីកិច្ចព្រមព្រៀងត្រូវបានចុះហត្ថលេខានៅទីក្រុងអ៊ីស្តង់ប៊ុល៕
អត្ថបទ៖ ប៊ុនថន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
