បាត់ដំបង៖ ផ្សារមោងឫស្សី និងតំបន់មួយចំនួនតាមបណ្ដោយដងស្ទឹងមោង ស្ថិតក្នុងស្រុកមោងឫស្សី ខេត្តបាត់ដំបង បាននិងកំពុងរងការលិចលង់ដោយជំនន់ទឹកភ្លៀង។

លោក ឡុង សុភឺន អភិបាលរងស្រុកមោងឫស្សី បានថ្លែងប្រាប់ទូរទស្សន៍BTVនៅថ្ងៃទី២៩ ខែកក្កដា ឆ្នាំ២០២២នេះថា ការជន់លិចផ្សារមោងដោយសារតំបន់ខាងលើមានភ្លៀងធ្លាក់ខ្លាំង និងម្យ៉ាងទៀត​ដោយសារក្រុមហ៊ុនសាងសង់ផ្លូវជាតិលេខ៥ ធ្វើទំនប់ដើម្បីសាងសង់​ស្ពានឆ្លងកាត់​ស្ទឹងមោង។

លោក ឡុង សុភឺន បានឱ្យដឹងបន្ថែមថា ជំនន់ទឹកភ្លៀងនេះ បានលិចចូលតូបលក់ដូរក្នុងផ្សារ​មោង​ទាំងស្រុង ​ប៉ុន្តែមិនបង្កផលប៉ះពាល់ដល់ទ្រព្យសម្បត្តិ ​និងអាយុជីវិតប្រជាពលរដ្ឋឡើយ។

លោក បានបង្ហាញក្ដីរំពឹងថា ជំនន់ទឹកភ្លៀងនេះ​អាចស្រកចុះវិញនៅរសៀល ឬល្ងាចនេះក្នុង​ករណី​តំបន់ខាងលើពុំមានភ្លៀងធ្លាក់បន្តទៀត ខណៈក្រុមហ៊ុនសាងសង់ផ្លូវជាតិលេខ៥ បាន​បើក​ទំនប់បង្ហូរទឹក​ទៅតំបន់ខាងក្រោម៕