ភ្នំពេញ៖ ដូចការគ្រោងទុក កិច្ចប្រជុំពិសេសលើកទី១ ឆ្នាំ២០២២ របស់​គណៈកម្មការ​អន្តររដ្ឋាភិបាល​អាស៊ាន​ទទួលបន្ទុកសិទ្ធិមនុស្ស ដែលហៅកាត់ថា (អាយឆា) បាន​ចាប់​ផ្តើម​កិច្ចប្រជុំ​​នៅ​ព្រឹកនេះ។

ឯកឧត្តម កែវ រ៉េមី ប្រធានគណៈកម្មាធិការសិទ្ធិមនុស្សកម្ពុជា តំណាងកម្ពុជាប្រចាំ អាយឆា និង​ជា​ប្រធាន​អាយឆា​ ឆ្នាំ២០២២ នៅព្រឹកថ្ងៃទី៣០ខែកក្កដានេះ បានដឹកនាំកិច្ច​ប្រជុំពិសេស​លើក​ទី​១ ​ឆ្នាំ២០២២ របស់អាយឆា ដោយមានការចូលរួមពីតំណាងប្រទេសសមាជិកអាស៊ាន ទាំង​អស់​ប្រចាំ​អាយឆា និងលេខាធិការដ្ឋានអាស៊ានផងដែរ។ កិច្ចប្រជុំនេះ ធ្វើឡើង​នៅ​សណ្ឋាគារ​កាំបូឌីយ៉ាណា រាជធានីភ្នំពេញ ចាប់ពីថ្ងៃទី ៣០ ខែកក្កដា ដល់ថ្ងៃទី២ ខែសីហា ឆ្នាំ២០២២។

ប្រតិភូតំណាងប្រទេសសមាជិកអាស៊ានប្រចាំអាយឆា រួមទាំងក្រុមការងារលេខាធិការដ្ឋាន អាស៊ាន នឹងធ្វើការពិនិត្យ ពិភាក្សា និងអនុម័តទៅលើរបាយការណ៍ប្រចាំឆ្នាំរបស់អាយឆា ឯកសារ​ទស្សន​ទាន​ ស្តីពីកម្មវិធីអាទិភាពរបស់អាយឆាឆ្នាំ២០២២ និងឆ្នាំ២០២៣ ឯកសារទស្សនា នៃ​សកម្ម​ភាព​របស់អាយឆា របាយការណ៍សកម្មភាពនានាដែលបានអនុវត្តរួចហើយ វឌ្ឍនភាព នៃ​កម្ម​វិធីនានាដែលមិនទាន់បានអនុវត្ត និងឯកសារសំខាន់ៗមួយចំនួនទៀត។

បន្ថែម​លើ​នេះ ក្នុងកិច្ចប្រជុំពិសេសលើកទី១របស់អាយឆាឆ្នាំ២០២២ ឯកឧត្ដម កែវ រ៉មី ប្រធាន​អាយឆា​ឆ្នាំ២០២២ នឹងដឹកនាំគណៈប្រតិភូអាយឆា ជួបប្រជុំដាច់ដោយជាមួយ ឯកឧត្តម Dato Lim Jock Hoi អគ្គលេខាធិការអាស៊ាន នៅព្រឹកថ្ងៃទី២ ខែសីហា ឆ្នាំ២០២២។ ដោយឡែក នៅរសៀលថ្ងៃដដែលនោះ ឯកឧត្តមប្រធានអាយឆាឆ្នាំ២០២២ នឹងដឹកនាំគណៈប្រតិភូអាយឆាន ប្រទេសអាស៊ានទាំង១០ និងក្រុមការងារលេខាធិការដ្ឋានអាស៊ាន ចូលរួមប្រជុំ​ក្នុង​កិច្ច​ជំនួប​ប្រចាំ​ឆ្នាំ រវាងគណៈកម្មការអន្តររដ្ឋាភិបាលអាស៊ាន ជាមួយរដ្ឋមន្ត្រីការបរទេសអាស៊ាន ផងដែរ​ ៕ អត្ថបទ៖ ទូច សោភ័ណ